Осылайша ол 60 миллион теңге тапқанымен ақыры жеті жылға сотталды
Гүлнар ҚҰРМАНБАЕВА Мұғалжар ауданының білім беру бөліміне қарасты екі балабақшада: "№3 Балауса" және "Гүлдер" ясли-балабақшасында есепші болып жұмыс істеген.
Сот үкімінде айтылғандай, есепші ақшаны көп табатын адамға айналудың жолын тапқан – өзіне бір айда бірнеше рет жалақы аударып отырған.
Осылайша, 2017 жылдың желтоқсан айынан 2024 жылдың маусым айына дейін пысық есепші бір балабақшадан 29 миллион 246 мың 003 теңге "тапқан". Дәл осы схеманы Құрманбаева тағы бір балабақшада есепші болып жұмыс істеп жүріп жүзеге асырған. Жалпы алғанда, есепші өзіне 60 миллион теңгеден астам қаражат аударған.
Құрманбаева соттан өзінің жүкті екенін, кәмелетке толмаған баласы бар екенін және шын жүректен өкінетінін ескеруді сұрады.
Сот есепшіні жеті жылға бас бостандығынан айырып, мемлекеттік және коммерциялық ұйымдарда материалдық жауапкершілікке байланысты бухгалтерлік қызметпен айналысу құқығынан 10 жыл мерзімге айыру туралы үкім шығарды.
Үкім әлі заңды күшіне енген жоқ.
Фото: © Ratel.kz / Айдын Олжаев.
Аударған А.Олжаев.
ТАҚЫРЫПҚА ОЙ ҚОСЫП, ПІКІРІҢІЗБЕН БӨЛІСУ ҮШІН TELEGRAM КАНАЛЫМЫЗ БАР!
