Мемлекет басшысының тапсырмасына сәйкес, өткен жылдың қарашасынан бүгінге дейін 2 700 мектептің ішінде 2 456 білім беру ұйымына жылы дәретхана орнатылды
Білім беру ұйымдарын жылы дәретханалармен қамтуды ұсақ мәселе деп қарауға болмайды. Бұл туралы ҚР Білім және ғылым министрі Асхат АЙМАҒАМБЕТОВ айтты, деп хабарлайды ҚазАқпарат тілшісі.
"Жалпы ауқымды жұмыс жүргізілді. Бізге "бұл министрлік деңгейінде қарайтын мәселе емес" деген пікірлер жетіп жатыр. Бірақ, балалардың қауіпсіздігіне, денсаулығына байланысты мәселе болғаннан кейін мұны ұсақ жайт деп қарауға болмайды. Өте маңызды мәселе. Алдыңғы жылы Тараз қаласында орын алған оқиға әлі де естеріңізде болуы керек. Сондықтан бізге бұл мәселені шешу бойынша 10 ай бұрын Мемлекет басшысының тапсырмасы болған. Қазір өздеріңіз көріп отырсыздар, бұған дейін 2 700 мектептің санитарлық-гигиеналық қажеттіліктері болмаса, бүгінде 2 456 мектепте жылы дәретханалар салынып, пайдалануға беріліп отыр. Қалғаны - 245. Оның 195-і қазір салынуда, қалған 50-і бойынша да жұмыс басталыпты", - деді Асхат Аймағамбетов министрліктің аппарат кеңесі барысында.
Сонымен қатар министр жылы дәретханалардың жұмыс істеп тұруы, одан кейін бөлек кабиналардың болуы, сумен қамтамасыз етілуі, басқа да мәселелер шешілуі керектігін баса айтты.
"Дәретахананы салғанымен оны жауып қойып, даладағы дәретханаға барып жүретіндей жағдайға жол бермеуіміз керек. Ондай жайттар да кездесіп тұрады, жасыратыны жоқ. Оны алдыңғы жылы көрдік. Сондықтан үлкен жұмыс жүргізілді деуге болады. Дегенмен, өңірлер бойынша жылдың соңына дейін жүргізілетін жұмыс көрсетілді. Білім басқармаларының басшылары осыны басты бақылауға алуы керек. Желтоқсанда бұл мәселені қайта қараймыз", - деді ол.
Айта кетерлігі, аппарат кеңесі барысында ҚР Білім және ғылым министрлігі Білім және ғылым саласындағы бақылау комитетінің басшысы Гүлзат КӨБЕНОВА Атырау, Алматы, Шығыс Қазақстан, Жамбыл, Батыс Қазақстан, Қарағанды, Түркістан облыстарында және Шымкент қаласында мектептерге жылы дәретхана салу мәселесі тежеліп отырғанын айтқан еді.
Елімізде дәретханасы аулада орналасқан 245 мектеп қалып отыр. Бұл туралы Гүлзат Көбенова айтты, деп хабарлайды ҚазАқпарат тілшісі.
"Бүгінде мониторингпен 6 971 мектеп қамтылды. Тек 245 мектеп ғана ауладаға дәретхана қалып отыр. Іс жүзінде бір жыл бұрын бұл сан 2 700-ден астамды мектепті құраған болатын. Осы арқылы өңірлердегі жылы туалет орнату динамикасын байқаймыз. Дәретхана аулада орналасқан 245 мектепте жынысына байланысты бөлу, аралық қабырға орнату сынды проблемалар бар. Дегенмен, бұл мектептер шешім тауып жатыр. Олардың ішінде 195 білім беру ұйымы жылы дәретхана орнату жұмыстарын жүргізу үстінде. Қалған 50 мектепке қатысты мәселе шешілуде. Бұл білім ордалары Атырау, Алматы, Шығыс Қазақстан, Жамбыл, Батыс Қазақстан, Қарағанды, Түркістан облыстарында және Шымкент қаласында орналасқан", - деді Гүлзат Көбенова министрліктің аппарат кеңесі барысында.
Оның атап өтуінше, дәретханаларды жынысқа байланысты бөлу, аралық қабырға жасау мәселелеріне де мониторинг жүргізілген. 33 мектеп дәл осындай сәйкессіздікті жоюы тиіс. 195 мектепте аталған проблеманы жоюға бағытталған жұмыс аяқталуға жақын. Олардың барлығында жыл соңына дейін кемшіліктерді жою жұмыстары атқарылады.
"Мемлекет басшысының тапсырмасына сәйкес, өткен жылдың қарашасынан бүгінге дейін 2 700 мектептің ішінде 2 456 білім беру ұйымына жылы дәретхана орнатылды. Жылы дәретханалар толыққанды жұмыс істеу үшін жынысына қарай бөлу, аралық қабырға қарастыру, су беру мәселесін шешу қажеттігіне назар аудартқым келеді. Әлі күнге дейін 197 ұйымда су беру проблема орын алып отыр. Сонымен қатар кәріз жүйесіне қосу мәселесін де шешкен жөн",- деді ол.
Фото: CABAR.asia.
