Алаяқтарға алданып қалмаңыз
Асеке – ойдан шығарылған адам дегенмен, оның басына туған күн сіз бен бізге де келіп тұрмасын.
Асекеңе балалары Үндістанға жолдама сыйлады. Өйткені Асекең бала кезінен Үндістанға қызығатын еді. Кезінде жұмыста озат болған бір ағасын совет одағы Үндістанға қыдыруға апарып, сол ағасының Үндістан туралы небір қызықты әңгімелерін естігенде Асекең аузын ашып тыңдаған.
Сонымен билеті дайын, отель брондалған, тіпті ұсақ-түйек экскурсиялардың билеті де сатып алынды. Көрші-қолаң, туған-туысы да Асекең Үндістанға барып демалмақ екенін естіп алған. Оның балаларын жарыса мақтап жатыр!
Енді қалғаны тек виза алу еді. Балалар түсіндіргендей, Қазақстан азаматтары үшін онлайн-виза керек екен. Оны алу үшін ресми сайтына кіріп, анкета толтыру қажет. Ұлы көмектесейін деп еді, Асекең оның көмегінен бас тартты: мені ақымақ дейсің бе, өзім-ақ толтыра аламын деген. Ұлы қасарысқан жоқ, біраз уақытты алатыны болмаса, ол анкетаны толтыру аса қиын шаруа емес еді.
Бірақ Асекең виза деген адам басына 25 доллар тұратынын білмеген екен. Ұлының көмегінен бас тартқанына өкінді. Жарайды, оны қойшы, әйелі екеуі компьютерді қосып, елшіліктің сайтын іздей бастады. Іздеуден бірнеше парақша шықты, түріне қарасаң бәрі бірдей. Бұлар көп ойланбай біреуін ашты-дағы анкетаға өз деректерін енгізе бастады. Бір сағаттан астам уақыт отырды, ақыры ақшасын төлейтін жерге келді.
Сөйтсе, сол сайттан-ақ төлей салуға болады екен, Асекең бұған қуанып кетті. Тез арада төлеп тастады.
Бірақ сол күні де, ертесінде де оған ешқандай виза келмеді.
Сасқан Асекеңе ұлына қоңырау шалып, не бүлдіріп қойғанын мойындауға тура келді. Алаяқтардың құрығына түсіп, ақшасын белгісіз біреулерге аударып жібергенін сонда түсінді. Асекең тағы да алданған екен.
Есіңізде болсын! Ресми сайттардың көптеген көшірмелері болады, онда бәрі түпнұсқадай көрінеді. Бірақ төлем жасаған кезде ақшаңыз шешіледі, ал виза келмейді, өйткені олар алаяқтар.
Сақ болыңыз және жеке мәліметтерді енгізу және виза төлемін төлемес бұрын сайттардың түпнұсқалығын мұқият тексеріңіз!
Фото: om-tour.ru.
ТАҚЫРЫПҚА ОЙ ҚОСЫП, ПІКІРІҢІЗБЕН БӨЛІСУ ҮШІН TELEGRAM КАНАЛЫМЫЗ БАР!
