Олар "егер жұмысты бәсекелі ортаға берсек, жұмыстың уақыты созылып, сапасы төмендейді" деп санаған
ШКО-ның Кәсіпкерлер палатасының құқықтық мәселелер бойынша директор орынбасары Әлия МҰҚАШЕВАҒА Алматыдан келген бизнесмен жүгінді. Ол Самар ауданында мемлекеттік сатып алудың ашық өтпейтін айтты: ол жердегі мемтапсырыс берушілер бәсекелестік орта дегенді пысқырмайтын көрінеді.
- Бұл арыз дереу Самар ауданының прокуроры Айдос ТҰРСЫНОВҚА жөнелтілді, ол аталған тендерлер бойынша тексеру ұйымдастырды. Тексеру нәтижесінде бейнебақылау орнату және қатты тұрмыстық қалдықтар полигонын қоршау бойынша сатып алулардың бір көзден тікелей келісімшарт жасау арқылы жүзеге асырылғаны анықталды, бәсекелестік ортада конкурс өткізу бойынша шаралар қабылданбаған, - деп хабарлады Әлия Мұқашева.
Сосын Самар ауданы прокуратурасы бұл жұмыстардың құны шын мәнінде әлдейқайда төмен бағалануы тиіс екенін анықтады. Ақыры іс сотқа жіберілді.
"Істі қарау кезінде мемлекеттік сатып алуды ұйымдастырушысы өз кінәсін жоққа шығарған жоқ. Бірақ ол "егер бәсекелестік ортаға берілсе, мерзімдер созылып, жұмыстардың сапасы төмендейді" деген уәжін айтты", - делінеді аудандық соттың материалдарында.
Барлық мән-жайларды ескере отырып, сот әкімдік өкілдеріне 369 200 теңге көлемінде әкімшілік жаза ретінде айыппұл салды. Екі лоттағы бұзушылықтарды ескере отырып, айыппұл 700 мың теңгеден асты. Іс мұнымен аяқталған жоқ. Әлгі шенеуніктер Шығыс Қазақстан облыстық сотының қылмыстық істер жөніндегі сот алқасына апелляция берді. Бірақ ол қанағаттандырылмады.
- Аудандардағы жергілікті атқарушы органдар әлі күнге дейін "Мемлекеттік сатып алу туралы" заңды бұзуда, бармақ басты көз қыстымен жекелеген кәсіпорындардың мүдделерін қорғап, бюджет қаражатын тиімсіз бөлуде, - деді ШКО Кәсіпкерлер палатасының құқықтық мәселелер бойынша директор орынбасары Мұқашева.
Фото: ашық дереккөзден.
Аударған А.Олжаев.
ТАҚЫРЫПҚА ОЙ ҚОСЫП, ПІКІРІҢІЗБЕН БӨЛІСУ ҮШІН TELEGRAM КАНАЛЫМЫЗ БАР!
