1 желтоқсанның түнінде осындай оқиға орын алды
Айтуға ұят! Айтпасқа тағы болмайды. Тағы да дәретханадан сәби табылды! Қызылорда қаласының КБИ мөлтек ауданындағы жеке үйлердің бірінің әжетханасынан шақалақ табылды. Оны сол шағын ауданда тұратын 23 жасар бойжеткен босанған көрінеді. Тірі туылған сәби түнімен әлгі жерде қалып қойғандықтан қақаған аязда үсіп кеткен.
"Бізге хабарлама 1-ші желтоқсан күні сағат 23:21 минут кеткенде түсті. Департаменттің жедел-құтқару жасағы бөлімінен 6 қызметкер мен 1 техника апардық. Құтқарушылар нәрестені шығарып алып, тергеу тобының қызметкерлеріне табыстады. Нәресте өлі табылды. Оны босанған адам ауруханада. Жағдайы орташа", - деді Қызылорда облысының төтенше жағдайлар департаменті бастығының міндетін атқарушы Руслан ҚАЙРАҚБАЕВ.
Ал, Қызылорда облысының полиция департаментінің тергеу басқармасының бастығы Әбдібек ЖАНАЗАРОВ осы оқиғаға қатысты ҚР Қылмыстық кодексінің 100 бабымен (Жаңа туған баланы анасының өлтiруi) сотқа дейінгі тергеп–тексеру амалдары басталғанын, тиісті сот–медициналық сараптамалар тағайындалғанын алға тартты.
Фото: Ⓒ Ratel.kz / Айнұр Тұңғышбаева.
