Ол жолдың жағдайын сенаторлар барып көріп қайтты
Сенаторлар Жанболат ЖӨРГЕНБАЕВ, Закиржан КУЗИЕВ, Амангелді ТӨЛЕМІСОВ және мәжілісмен Жанарбек ӘШІМЖАНОВ Жетісу облысында "Сарыөзек-Көктал" республикалық автомобиль жолының құрылысы барысын тексерді.
Өйткені қазір ол жол быт-шыт жағдайда тұр.
Облыс әкімдігінің баспасөз қызметі хабарлағандай, қазіргі уақытта мұнда су өткізгіш құбырлар, түсетін жолдар, екі қабатты асфальтбетон жамылғысы және жиектерді нығайту жұмыстары толығымен аяқталған. Жалпы, бұл жолдың жергілікті тұрғындар үшін әлеуметтік-экономикалық маңызы зор, ол Кербұлақ және Панфилов аудандарының аумағынан өтеді, жалпы ұзындығы 248 км.
Бұл жолдың ұзындығы 23 км болатын учаскесі (қырық бесінші шақырымнан алпыс сегізінші шақырымға дейін) 2024 жылдың соңына дейін аяқталуы тиіс. Депутаттар бұл учаскені қарап шығып, жолдың "иіріліп" жатқан таулы серпантиндегі қауіпті жерлерінде жолды кеңейту қажет екенін атап өтті.
Жергілікті билік өкілдерінің айтуынша, жолдағы үлкен проблемалардың бірі – жүк көліктерінің бақылаусыз өтуі. Сондықтан мұнда тасымалданатын жүктің салмағын өлшейтін арнайы таразылар орнатылады. Бұл асфальт жабынын сақтауға және бюджет қаражатын үнемдеуге мүмкіндік береді деп айтылды.
- Алматы облысы мен Жетісудағы проблемаларды кешенді түрде шешу керек. Сондай-ақ, бұл өзекті мәселелерді жергілікті мәслихаттардың белсенді қатысуынсыз шешу мүмкін емес. Осындай өзекті мәселелердің бірі – жолдарымыздың сапасы. Тағы бір маңызды мәселе – сумен жабдықтау және су үнемдеу. Қазір еліміздің жаңа Су кодексін қабылдау мәселесі белсенді талқылануда.
Бұл тек Қазақстанның немесе Орталық Азияның ғана мәселесі емес, суды ұрпақтарға сақтау – жаһандық проблема. Мұндағы плотинаға келетін болсақ, оның жағдайы қанағаттанарлық, бірақ, әрине, күрделі жөндеусіз болмайды. Алдағы күндері көрші Ақсу, Сарқан және Алакөл аудандарына шығу жоспарлануда. Біз сияқты депутаттар үшін сайлаушыларымыздың қалай өмір сүріп жатқанын түсіну маңызды. Кездесулер барысында көтерілген барлық мәселелерді біз назарға алып, жауапты тұлғаларға жеткіземіз, - деп атап өтті сенатор Амангелді Төлемісов.
Фото: © Ratel.kz / Әлия Ахмедиева.
ТАҚЫРЫПҚА ОЙ ҚОСЫП, ПІКІРІҢІЗБЕН БӨЛІСУ ҮШІН TELEGRAM КАНАЛЫМЫЗ БАР!
