Компания бүкіл Қазақстан бойынша қызмет көрсетудің заманауи стандарты мен жоғары сапалы жанармай брендін ұсынады
Ақтөбелік Қайрат ҚОЙШИН – құрылыс бизнесімен айналысатын кәсіпкер. Өзі бизнесмен болған соң, табыс әкелетін бағыттарды табу үшін үнемі нарыққа көз тігіп отырады. Оның ойынша, қазір көлікке жанармай құю бизнесінің тасы өрге домалап келеді, өйткені елімізде автокөлік саны күн санап көбейіп барады. Нарықты мұқият саралаған ол Qazaq Oil франшизасына тоқталған екен.
– Ең алдымен бәсекеге қабілетті болу керек, – дейді Қайрат Қойшин. – Клиенттерге сапалы жанармай өнімдерін ұсынып, қолжетімді бағалармен сервистік қызмет көрсеткен дұрыс. Біз франшизаның барлық талаптарына сай болу үшін жанармай құятын кешеннің құрылысына мұқият қарадық. Оның үстіне, біз осымен жаңа жұмыс орындарын құрып отырмыз. Біздің жанармай бекетімізде 20 адамға жұмыс орны ашылады.
Qazaq Oil өзінің DODO дейтін жаңа франчайзингтік бағдарламасын 2021 жылдың жазында іске қосқан болатын. Сол кезден бері компания ендігі 30 серіктесіне осы брендті, қызмет көрсетудің заманауи стандарттарын, әдістемелер мен регламенттерді, сондай-ақ сапалы жанармай мен қажетті ілеспе тауарларды ұсынып келеді.
– Серіктестердің жанармай бекеттеріне келетін клиенттер бұл жерде тура Qazaq Oil-дың өз бекеттеріндегідей сапалы жанармай мен үлгілі қызмет алатынына алаңдамауы тиіс. DODO автожанармай құю станциялары да Qazaq Oil-дың барлық станцияларымен бірге үнемі сапа бақылауынан өтеді: жанармайдың сынамасы мен құю дәлдігінен бастап қызметкерлердің скрипт білуі мен бүкіл кешеннің ішіндегі тазалыққа дейін, – дейді PetroRetail компаниясының қоғаммен байланыс қызметінің басшысы Анель ЕЛІКБАЕВА.
Барлық жанармай құю станцияларында көлікке сапалы отын құйып алумен қатар, ылғал сүлгіден бастап әйнекке шашатын сұйықтыққа дейін жолға ең қажет заттарды алуға болады – әрбір кешендегі Dala Market дүкендерінде тіпті жүрек жалғап, шай немесе Q-кафенің кофесін ішуге жағдай жасалған.
Жалпы, Qazaq Oil франшизасының арқасында еліміздің әр түкпірінде 400-ден астам адам өзіне тұрақты жұмыс тапты. Қазір Қазақстанда DODO бағдарламасымен ашылған 30 жанармай құю станциясы жұмыс істейді: Қостанай облысындағы Денисовка ауылынан бастап ел оңтүстігінің шетіндегі Асық-Атаға дейін, батыстағы Маржанбұлақ ауылынан бастап Семейде ашылған екі жаңа кешенге дейін.
- Бүгін біздің компания DODO – Dealer owned – Dealer operated бағдарламасымен "мерейтойлық", осымен 30-шы серіктес жанармай құю станциясын ашып отыр. Біз үш жылға жетер-жетпес уақытта франшизамен 30 жанармай бекетін аштық, отызыншысы бүгін міне, Ақтөбеде ашылды. PetroRetail компаниясының жоспары осымен тоқтамайды. Біз 2024 жылға дейін Қазақстан картасындағы серіктес станциялар санын 50-ге дейін жеткізуді ойластырып отырмыз, - деп қосты Анель Елікбаева.
Qazaq Oil – жай ғана жанармай құятын жер емес. Қазір ол ең заманауи құралдармен жабдықталған жанармай мен non-oil-ретейл саласындағы кең форматты компанияға айналған. Серіктестер желісінің кеңеюі ел бюджетіне түсетін салық аударымдарының жалпы сомасына тікелей әсер етті, өткен жылдың өзінде компания мемлекет қазынасына 13,6 млрд теңге төледі.
Фото: Qazaq Oil.
ТАҚЫРЫПҚА ОЙ ҚОСЫП, ПІКІРІҢІЗБЕН БӨЛІСУ ҮШІН TELEGRAM КАНАЛЫМЫЗ БАР
