Кәсіпкерге қастандық жасағандарға қатысты бап "бұзақылыққа" ауыстырылса, олар түрмеден босап шығуы мүмкін
Қазақстандық кәсіпкер өміріне алаңдап араша сұрады. Осыдан жеті жыл бұрын Олжас Мұқажанов пен досына оқ атылған еді. Үш адам 14 және 13 жылға сотталды, Sputnik деп хабарлады.
Енді іс сотта қайта қаралып, олардың бабы "бұзақылыққа" ауыстырылса, олар босап шығуы мүмкін дейді. Ал тапсырыс беруші халықаралық іздеуде болғанмен, әлі күнге ұсталмаған, деп хабарлады КТК.
"Мені өлтіруге тапсырыс берген Анарбек Ерланның таныстары мен ақшасы көп. Алда-жалда ақталса, менің көзімді құртуға қайтадан бекінері сөзсіз. Өз өмірім үшін алаңдаймын", - дейді Олжас Мұқажанов.
Оның айтуынша, қазір прокурор соттан "адам өлтіруге оқталу" бабын "бұзақылыққа" ауыстыруды сұрап отыр.
"Бір түсінбейтінім, о баста травматикалық тапаншамен бір метрден кем қашықтықта атылғаны дәлелденген. Енді келіп бір жарым метр жерден атылған, ол қашықтықтан адам өміріне қауіп төнбейді деген басқа бір сарапшының қорытындысын алға тартады. Егер де сот бұрынғы қаулыны бұзақылыққа ауыстырса, онда тапсырыс беруші автоматты түрде ақталады", - деп түсіндірді кәсіпкер.
2014 жылдың 26 қаңтарында елордада кәсіпкер Олжас Мұқажанов пен оның танысын белгісіз біреулер травматикалық қарумен атып кетті. Кәсіпкер бұл шабуылды бизнесіне көз салғандардың әрекеті деп түсінді. Артынша күдіктілер ұсталып, ол долбары расталды.
2015 жылы үш айыпты Қылмыстық кодекстің 24-бабы бойынша 14 жылға дейін сотталды. Ал қылмысқа тапсырыс берді деген Ерлан Анарбекке халықаралық іздеу жарияланды. Ол әлі күнге дейін ұсталмады. Бүгінде денсаулығынан да, бизнесінен де айырылған азамат әділдік орнағанын, кінәлілер жазасын толық өтегенін қалайды.
ПОДПИСЫВАЙТЕСЬ НА НАШ КАНАЛ И ЧИТАЙТЕ НАС В TELEGRAM!
