Алматыда Qazaq Oil жанармай құю станциясында жоспардан тыс тексеру өтті
Бұл жолы бензиннің сапасын БАҚ өкілдері тексерді. Тілшілер Розыбакиев пен Егізбаев көшелері қиылысындағы станцияның жұмысын бақылады.
- Бензиннің сапасын міндетті түрде тексеру керек. Ең алдымен температурасын, тығыздығын октан санын анықтаймыз. Егер кейбір параметрлер дұрыс болмаса көлік қозғалтқышына, экологияға зиянын тигізеді. Сол үшін осы мәселені міндетті түрде бақылауда ұстап отырамыз.
Ай сайын станцияларға қызметкерлер барып, сынама алып, зертханаларда зерттеу жұмыстарын жүргізеді. Сондықтан, біз кері байланысқа шығып, шағымдармен жұмыс істеуге дайынбыз. Біз клиенттің көзінше тексеру жүргізе аламыз. Бірақ биыл ондай арыз түспеді, - деді станция менеджері Ардақ НЕСІПБЕКОВА.
Тексеру процесі туралы Qazaq Oil зертханалар директоры Ғалия МЕДЕТБАЕВА айтып берді.
- Біздің зертханалар Алматы, Астана, Атырау сияқты ірі қалаларда орналасқан. Басты мақсат – зауыттан бастап тұтынушыға дейін жететін мұнай өнімдерінің сапасын бақылау. Зауыттан келетін мұнай өнімдерін қабылдау кезінде де сынама алынады. Вагон цистерналар мұнай базасында тексеріледі. Сақтау кезеңінде де мұнай базаларында айына бір рет мұнай өнімдерінің сапасын тексеру үшін сынама алып отырамыз. Ай сайын жанармай құю станцияларындағы сынамалар зертханаға жеткізіледі, - деді Ғалия Медетбаева.
Мұнай Атырау, Павлодар, Шымкент қалаларынан жеткізіледі. Қазақстандағы зауыттар еуростандартқа көшкен. Мұнда тек 4 және 5 классты бензин өндіріледі.
Тексеру барысында төменгі, ортаңғы, жоғарғы орналасқан резервуарлардағы бензиннен сынама алынды.
Содан кейін тілшілер зертханаларға Алматы облысына барды.
Зертханаларда бензиннің октан саны, фракциялық құрамы, күкірт пен су мөлшері, қату температурасы тексеріледі (егер дизель отыны болса). Инженер арнайы қондырғыда ең басты көрсеткіш октан санын тексерді.
Егер октан саны жоғары болса қозғалтқыш жұмысы барысында жану деңгейі тұрақты болады.
Тексеру нәтижесінде АИ-95 маркалі бензинінің октан саны 95,7 көрсетті. Бұл көрсеткіш өте жақсы дегенді білдіреді.
Сонымен қатар, зертханада фракция құрамы тексерілді. Ол моторды қосу қаншалықты жеңіл болатынын көрсетеді.
- Біз автоматты немесе қолдан тексеру тәсілін қолданамыз. Қолдан тексеру кезінде температураны, булану мөлшерін өзіміз анықтайтын боламыз, - деді аға лаборант Айзада ЖАРБОЛОВА.
Тағы бір маңызды көрсеткіш – тығыздық. Ол үшін лаборант бензинді цилиндрға құйып, термостатты қосады. Тығыздықты ареометр арқылы өлшейміз. Талдаудың арқасындағы паспорттағы мәліметтердң шынайылығы тексеріледі.
Журналистер тексеру барысында Qazaq Oil жанармай станциясындағы АИ-95 маркалі бензин ГОСТ стандарттарына сай екендігіне көз жеткізді.
Бензинде механликалық қоспалар мен су жоқ болып шықты.
Сонымен қатар, компания қызметкерлері Қазақстанда жаңа отандық сауда маркасы Tulpar-95 бензині шыққанын айтып берді. Бұл жоба франциялық Total Energies мұнай компаниясымен бірігіп жасалып жатыр.
- Есеп бойынша жүргізушілер бензинді 5 пайызға дейін үнемдей алады. Жану қалдығы қалмайды. Соның арқасында қозғалтқышты қосу жақсара түседі, - деді мамандар.
ПІКІРІҢІЗБЕН БӨЛІСІП, МАҚАЛАНЫ ТАЛҚЫЛАУ ҮШІН ТЕЛЕГРАМ АРНАМЫЗҒА ТІРКЕЛІҢІЗ!
