Кім қай қауымға ұқсаса, ол сол қауымнан
Православ христиандарының Крещение мерекесіне мұсылмандардың қатыспағаны абзал. Ислам дінінде бұл күнәлі әрекет болып саналады, деп жазады ҚазАқпарат.
Әр жыл сайын 18 қаңтардан 19-ына қараған түні дүниежүзінің православ христиандары Крещение мерекесін атап өтеді. Бұл дін өкілдерінің сенімі бойынша, сол күні суға түсу арқылы адам күнәсінен тазарады.
Ал ислам діні оған құрметпен қарауға шақырғанмен, имамдар мұсылмандардың бұл дәстүрге, мерекеге қатыспауын ескертті.
- Ислам дінінде біздерге Алланың елшісі Мұхамед (с.ғ.а.) бекітіп берген белгілі бір мереке күндеріміз бар. Өзге дін өкілдерінің де мерекесіне ешқандай қарсылық пен кедергі жасауымызға болмайды. Бірақ олармен бірге тойлауға рұқсат етілмейді. Өйткені пайғамбарымыз: “Кім қай қауымға ұқсаса, ол сол қауымнан”, - деген. Мұсылмандар арасында қандай да бір адам сол күні суға шомылуды қасиет санаса, ол күнәлі әрекет болып саналады, - деді ҚМДБ Жетісу облысы бойынша шәриғат және пәтуа бөліміне жауапты маман Қамит ТАБАРАК.
Фото: Қамит Табарактың жеке мұрағатынан.
ТАҚЫРЫПҚА ОЙ ҚОСЫП, ПІКІРІҢІЗБЕН БӨЛІСУ ҮШІН TELEGRAM КАНАЛЫМЫЗ БАР!
