Қосымшаны әзірлеушілер салықтың есеп-қисабын толтыруды, кіріс пен салықтың есебін жүргізуді автоматтандырды
Қазақстанда кәсіпкерлерге арналған е-Salyq-Business мобильді қосымша пайда болады, деп хабарлады қаржы министрлігінің баспасөз қызметі.
Үкіметте кәсіпкерлік қызметті жеңілдетуге, соның ішінде жеке кәсіп ашуға және жабуға, салықтарды есептеу мен төлеуге, салықтың есеп-қисабын толтыруға арналған электронды е-Salyq-Business мобильді қосымшасының таныстырылымы өтті.
Мобильді қосымша онлайн режимінде жеке кәсіпкер ретінде тіркелуге, салық режимін таңдауға немесе өзгертуге, түбіртек беруге, салықтың есеп-қисабын толтыруға/жіберуге, салық төлеуге, хабарлама/анықтама алуға, төлемдерді басқаруға және мемлекеттік кірістер органдарынан белгілі бір қызметтерді пайдалануға мүмкіндік береді.
Қосымшаны әзірлеушілер салық пен әлеуметтік төлемді есептеуді, салықтың есеп-қисабын толтыру мен ұсынуды, кіріс пен салықтың есебін жүргізуді автоматтандырды.
Е-Salyq-Business мобильді қосымшасы пилоттық түрде биыл шілдеде іске қосылады. Бірінші кезеңде қосымшаны шамамен 100 мың адам қолданады деп жоспарланып отыр.
