Ата-аналар шулап, білім басқармасы бұл қауесетті жоққа шығарды
Қостанайда тұратын, бала өсіріп отырған кейбір ата-ана дүрлігіп жатыр. "Орыс тілінде тәрбиелейтін топтарға бала қабылдамаймыз" деген бір балабақшаның бір жауабын скриндеп алып, бір-біріне таратып-ақ жатыр екен.
Журналистер осы сұрақты көтеріп, оған өңірлік коммуникация қызметінде өткен брифингте Қостанай облысы Білім басқармасы басшысының орынбасары Данагүл СҮЙІНДІКОВА жауап берді:
- Білімге жауапты бөлім бұл мәселені шешеді деп ойлаймын. Балалар өз қажетіне қарай қай тілді таңдаса, сол тілде сөйлейді. Мемлекеттік тілде болсын, орыс тілінде болсын. Балабақшалар мемлекеттік тапсырыс алады, тапсырысты қалай беретінін өздері біледі. Онда бәрі биылғы оқу жылына деп көрсетілген сомалар мен нормативтер аясыннан аспайды. Менің ойымша, орыстілді топтар азая қоймайды.
Қостанайдың білім бөлімі Ratel.kz сауалына жауап берді. Орыс топтарға қабылдау тоқтады деген ақпаратты ата-аналар қаладағы №3 балабақшадан естіген көрінеді.
“Қостанай қалалық білім бөлімі орыс тілінде оқытатын топтарға балаларды қабылдау тоқтатылды деген ақпараттың жалған екенін ресми түрде хабарлайды.
Бүгінде қаладағы мектепке дейінгі ұйымдарда барлығы 510 топ жұмыс істейді, оның ішінде 181 топ мемлекеттік тілде, 329 топ орыс тілінде оқиды.
2023-2024 оқу жылының қорытындысы бойынша қаладағы балабақшаларды 102 топ бітіреді. ҚР Тілдер туралы Заңын іске асыру аясында жүзеге асырылып жатқан Жол картасына сәйкес, жаңа оқу жылында мемлекеттік тілде оқытатын 49 топ және орыс тілінде 53 топ ашылады”, - делінеді ведомствоның жауабында.
Егер ата-ана мен балабақша әкімшілігінің арасында түсінбеушіліктер туындап қалса не істеу керек, деген сұраққа білім бөлімінің басшысы Гүлсім ОРАЗБАЕВА былай деді:
- Туындаған барлық сұрақтар бойынша Білім бөліміне тікелей хабарласыңыздар. Біздің мекен-жайымыз: Байтұрсынов көшесі, 67. Біз бірден жауап қатамыз.
Биыл Қостанайда екі жаңа балабақшаның құрылысы аяқталып, екеуін де қолданысқа беру жоспарланған. Екеуі де қаланың жылдам өсіп келе жатқан ықшамаудандарында салынуда – “Юбилейный” ықшамауданында 280 орындық, “Аэропорт” ықшамауданында 280 орындық. Тағы бір 280 орындық балабақша Әулиекөл ауданында ашылады деп жоспарланған.
Аударған А.Олжаев.
Фото: pixabay.
ТАҚЫРЫПҚА ОЙ ҚОСЫП, ПІКІРІҢІЗБЕН БӨЛІСУ ҮШІН TELEGRAM КАНАЛЫМЫЗ БАР!
