Туған ауылыңдағы мектепке де пара бермесең жұмысқа кіре алмайсың
Түркістан қаласының сотында бертінге дейін Түркістан облыстық дене шынықтыру және спорт басқармасының бастығы болған 60 жастағы Айтмахаметәлі БЕРДАШЕВКЕ үкім шықты. Ол пара алғаны үшін айыпты деп танылды. Онымен бірге 1992 жылғы қызы Ұлжан (“Түркістан қаласының балалар мен жасөспірімдер спорт клубында” тәрбие жөніндегі орынбасар болған) және 1993 жылғы, жұмыссыз жүрген Нұрдәулет ТҰРСЫНХАН сотталды. Сондай-ақ пара беруші – Түркістан облысы Бәйдібек ауданындағы Шаян ауылының тумасы, 32 жастағы Рүстем ЖҮНІСБЕКОВ сотталды.
Былай болған екен. Кезінде өзі де жүзуден тәуір спортшы болған Рүстем Жүнісбеков біраз жыл туған ауылы Шаянда күзетші, құтқарушы, сосын Түркістан облысының №3 Балалар мен жасөспірімдердің олимпиадалық резерв спорт мектебінде (Шаяндағы СДЮСШОР №3) жүзуден инструктор болып жұмыс істеген. Бірақ кейін тиісті жоғары білімі болмағаны үшін спорт мектебінен кетуіне тура келген.
Сонда да қайтпайтын мінезі бар жігіт Шымкенттегі Академик Ә.Қуатбеков атындағы Халықтар достығы университетіне оқуға түсіп, былтыр жазда оқуын сәтті бітірген. Дене шынықтыру мен спорт жөніндегі маманның дипломын алып, туған ауылындағы мектепке тренер болып қайта жұмысқа тұрмақ болады. Бірақ келе қалған адамды жұмысқа ала қоятын мектеп жоқ екенін түсінген Рүстем таныс тап деп өзінің досы Нұрдәулет Тұрсынханға қолқа салған.
Өйткені Тұрсынханның танымайтын адамы жоқ. Түркістанның спорт саласында бұрыннан жүрген Ұлжан Бердашевамен де жақын таныстығы болатын. Ал Ұлжанның әкесі – облыстық дене шынықтыру және спорт басқармасының бастығы еді. Тұрсынхан Ұлжанға айтып, Ұлжан әкесі Айтмахаметәлі Бердашевке жеткізіп, ақыры 500 мың теңге тауып берсе Рүстемді қалаған қызметіне тағайындайтын боп келіседі. Оның жартысын – 250 мың теңгені алдын-ала берсін депті. Содан Рүстем Жүнісбеков шешесіне кредит алғызып тұрып, әлгі 250 000 теңгені Тұрсынхан арқылы Бердашевтерге берген.
Одан соң Рүстемді жұмысқа алған, бірақ жарты ставкаға ғана алыпты. Толыққанды штатқа кіруі үшін ақшаның қалған жартысын беруі тиіс екен. Амалсыз шешесіне тағы да кредит алғызып, биыл 16 қазанда қалған 250 мың теңгені аударып жіберді. Содан соң ғана толық ставкаға жұмысқа тұрды. Бірақ қуанышы алысқа бармады. Жемқорлыққа қарсы күрес қызметі бәрін біліп қойып, бұларды түгел қылмыстық жауапкершілікке тартты.
Сотта бұлардың бәрі болған істі мойындап, енді өкінуден басқа шарамыз жоқ десті.
Істі қараған сот төрағасы, судья Жанәбіл АҚЫНОВ сотталушылардың бәріне тақылдатып айыппұл тағайындап тастады: Айтмахаметәлі Бердашев 25 миллион теңге, Рүстем Жүнісбеков 15 миллион теңге, Ұлжан Бердашева мен Нұрдәулет Тұрсынхан екеуі 5 миллион теңгеден айыппұл арқалады.
Айыппұлдарын өз еркімен төлеуіне екі ай мерзім берілді, одан кейін төлемесе жаза түрме мерзіміне ауыстырылуы мүмкін. Аты аталғандардың бәрі енді өмірінде мемлекеттік қызметке жолай алмайтын болды. Әрқайсысы жәбірленушілердің өтемақысы қорына 55 380 теңге төлеуі тиіс.
Фото: © Ratel.kz / Айдын Олжаев.
Аударған А.Олжаев.
ТАҚЫРЫПҚА ОЙ ҚОСЫП, ПІКІРІҢІЗБЕН БӨЛІСУ ҮШІН TELEGRAM КАНАЛЫМЫЗ БАР!
