Қара құрт жеген қой семіреді, қан соқта жеген ит семіреді, пара жеген би семіреді
«Сагол» әзірбайжан тілінде рақмет дегенді білдіреді. Бірақ осы сөздің Әзербайжанда басқаша да мағынасы бар.
Мысалы саған қызмет көрсеткен адамға, алғыс есебінде 10-20 манат қалдырып кетсең, соны да «сагол» дейді.
Ал, егер де бір үлкен мәселені шешіп берсе сонда сен «Хөрмет» дегенді қалдыру міндеттісің, соған сай оның құны да көбірек болады.
Қызылорда облысы Жаңақорған ауданындағы қайын-жұртқа қыдырып бару үшін, алдымен ұшақпен, әрмен қарай маршруткамен баруға тура келген кезде бір оқиғаның куәгері болдым.
Көлікті зырылдатып айдап келе жатқан жүргізуші кілт тоқтап, жол бойындағы жол полиция қызметкеріне жолығып келді. Қайтып келгенде жүргізушіден:
- Сізді тоқтатпасада, неге жолполға бардыңыз?
- Барып рақметімді бердім.
- Рақмет? Онысы несі?
- Аспаннан түстің бе? Күніне 300 теңге рақметімізді беріп тұрамыз.
- Олай болмайды ғой!
- Соның қажетің не бар? Бұл біздің салт дәстүріміз...
Сондай кезекті сапардың бірінде пойызға жолсерік болып, бір келіншек отырады. Оңтүстік өңірдегі университеттердің бірінде сабақ береді екен. Мінгеннен көңілі-күйі жоқ болып, өз-өзімен бұрқылдаумен болды:
- Түйй бір, Астанаға дәл қазір жібергенін қарашы. Сессиямды өткізіп жібермеді ме жіберетін іссапарына. Енді ақшам аз болып, жол үстінде кетіп бара жатырмын деді.
- Сессиядан кейін айлық бермей ме?
- Жоқ, сессияда студенттер рахметін береді.
- Бұның дұрыс емес қой!
- Бәрі дұрыс. Рақмет беру бұл ата-бабаларымыздан келе жатқан салт-дәстүр....
Астана. Облыстан бір танысым күрделі мәселесін шешуге келді. Сосын оны жасы үлкен бір кісімен таныстырдым. Олар оған біраз кеңес беріп, танысымның мәселесі шешілді. Досым қуанышын бөліспекке сол кісіні ресторанға шақырып әбден алғысын айтты. Келесі күні сол үлкен кісі маған телефон арқылы хабарласып:
- Осы сенің танысың жақсы жігіт емес екен, не рақметі, не құрметі жоқ. Бір ресторанмен құтылғысы келді. Салт-дәстүрді дым білмейді екен....
О түркі әлемі! Біздің бауырлас халықтар екеніміз нағыз шындық! Түркілерге ең жақын парсы сөзі болса да, пара ол барлық жерде пара.
«Фейсбук» парақшасынан алынған
