Абай облысында ауыл мектебі әкімдерден қалыспайын деген екен
Абай облысы білім басқармасының Ақсуат ауданы білім бөлімінің Қожагелді батыр атындағы орта мектебі 21 716 800 теңгеге (ҚҚС-сыз) автокөлік сатып алу үшін мердігер іздеуде. Бұл сомаға тағы 12 пайыз ҚҚС қосылады.
Техникалық сипаттамада көрсетілгендей, білім беру мекемесіне биыл шыққан су жаңа, жүрмеген кроссовер керек екен. Орындықтары "кожа" болсын, 4.3" цифрлы панель, 12.3" дисплейі бар мультимедиалық жүйе, Apple CarPlay және Android Auto, салонның атмосфералық жарығы, диодты шамдары, акустикалық, көпқабатты алдыңғы терезесі болуы шарт. Ауылдағы шағын мектепке дәл осындай көліктің неге керегін білмедік.
Мемлекеттік сатып алу порталының деректеріне сүйенсек, мектеп жақында ғана 14 миллион теңгеге көлік сатып алған. Тендерді "АКС" ЖШС-і жеңіпті. Алайда көлікті жеткізу бойынша жасалған келісімшарт әлі тіркелмеген. Бұл көлік қарапайымдау болғанымен, оның да орындықтары табиғи және жасанды былғарымен қапталған, 8" дисплейі бар аудиожүйесі (Radio + RDS), LCD мониторы бар аспаптар панелі және автоматты күңгірттенетін айнасы бар.
Халқы бес мыңға жетпейтін шағын ауылдағы мектепке мұндай автокөлік не үшін қажет?
Бір қызығы, мұндай қымбат көлікті тіпті аудан әкімдіктері де сатып алмайды. Мысалы, Абай облысының Үржар ауданы әкімінің аппараты қазір 15,5 миллион теңгеге (ҚҚС-сыз) көлік сатып алмақ. Ал Абай облысы Бородулиха ауданы Құнарлы ауылдық округінің әкімі аппараты небәрі 7 миллион теңгеден сәл асатын көлік сатып алуда. Яғни, ауыл мектебіне арналған көліктің бағасы екі әкімдік алатын көліктің құнымен тең.
Мектеп мұғалімдері шенеуніктерден артық өмір сүретін күнге жеткен екенбіз ендеше.
Фото: depositphotos.com.
Аударған А.Олжаев.
ТАҚЫРЫПҚА ОЙ ҚОСЫП, ПІКІРІҢІЗБЕН БӨЛІСУ ҮШІН TELEGRAM КАНАЛЫМЫЗ БАР!
