Резеңке етік сәнге айналған ауыл жұртының ахуалы
Қар ери бастағалы Талғар ауданына қарасты Еламан ауылының тұрғындары батпаққа батып, есігінің алдынан алысқа аттап баса алмай отыр, деп хабарлайды Информбюро 31.
Көшелері жөндеу көрмей, лай кешкен халық "биліктің назары бізге бір түспей қойды" деп ашулы.
- Еламан ауылының тұрғындары көктем шықса болды тізеден балшық кешіп жүреді. Жаяу адам тұрмақ, міне көлікпен жүргендердің де ары-бері қатынауы қиын. Жұрт ми батпақ пен шалшық судан әбден шаршадық дейді. Асфальты бар көшеге жету үшін аяқтарына целлофан киіп жарты шақырымға жуық жол жүреді, - дейді телеарна тілшісі Диана ТҰРЛЫБЕК.
- Қыста ғана жанымыз тынышталады. Көктем басталады міне, батпақ болып, не бала-шағаның киімінен киім жоқ. Жаздай шаңға көміліп, есік-тереземізді қымтап, тұншығып тағы жатамыз. Оның бәрін бұрынғы әкім көрген. Қолдан келгенше өзіміз жолға күл төгіп, құрылыстан қалған топырақтарды төктік, осы жол дұрысталсыншы деп, - дейді Еламан ауылының тұрғыны Айсара САТЫМБАЕВА.
Ата-аналар ең әуелі мектепке жаяу барып, жаяу келетін оқушыларға қиын дейді. Жылына 3-4 етік сатып аламыз, ал, оның өзі қалтаны қағады деп отыр.
- Жылда 3 етік, 4 етік аламыз. Ол айналып келгенде халықтың қалтасына тиюде. Облысқа дейін барып, осы мәселені көтердік. Олар су жүргізілмей жолды жасамаймыз дейді. Ал, енді суға барсақ су 98 пайыз бітіп тұр, 2 пайызы бітпей тұр деген сылтау айтады. Ол уәдесіне 5 жыл болды, - дейді Еламан ауылының тұрғыны Шынар ӨТЕГЕНОВА.
Ал, халық алдына шыққан жауаптылар батпаққа батып отырған тек Еламан ауылы ғана емес дейді. Дәл осындай тағы 150 көше бар екен. Сондықтан, жөндеу жұмыстарын кезең-кезеңімен жасаймыз деп сендірді.
- Бюджет бір күнде немесе бір жылда беріледі. Бөлініп-бөлініп, жылда 20-30 көше жасалып жатыр. Бірақ Еламан ауылында аманшылық болса, биылға 10 көше жоспарда тұр. Оған қаражат бөлінді, - дейді Қайнар ауылдық округінің әкімі Нұрбол ЕСЕНБАЕВ.
Бес жыл бойы құрғақ уәдеге тойдық деген тұрғындар әкімнің бұл сөзіне де күмәнмен қарайды. Тым құрығанда тас төсеп берсе деген тілектері бар.
Фото: Информбюро 31.
ТАҚЫРЫПҚА ОЙ ҚОСЫП, ПІКІРІҢІЗБЕН БӨЛІСУ ҮШІН TELEGRAM КАНАЛЫМЫЗ БАР!
