Мамандар күзде сиреннің гүлдеуін қазан айындағы аномальды жылы ауа райымен байланыстырады
Алматыда ботаникалық бақтың "Сирингарий" коллекциялық учаскесінде тарихта алғаш рет күздіңгүні сирень гүлдеді, деп хабарлайды ҚазАқпарат.
18 қазанда ботаникалық бақтың Instagram парақшасында табиғаттың ерекше құбылысы туралы видео жарияланды.
Яғни, бақтың "Сирингарий" коллекциялық учаскесінде алғаш рет сирень беймезгіл гүлдеді.
"Учаскенің кураторы Виктор ДЕГТЕВ жақында ісінген бүршіктерді байқаған, алайда, жайқалып гүл жаяды деп күткен жоқ. Сиреннің сортты емес, жабайы түрлері гүлдеді. Мамандар күзде сиреннің гүлдеуін қазан айындағы аномальды жылы ауа райымен байланыстырады. Ал, біз табиғаттың ерекше құбылысына куә болғанымызға қуаныштымыз", - делінеді видео астындағы жазбада.
Сондай-ақ, видео авторларының мәліметінше, ботаникалық бақта сиреннің Қазақстандағы ең ірі және Орталық Азиядағы жалғыз коллекциясы бар.
Учаскенің аумағы – 1,8 га. Қазіргі уақытта коллекцияда әлемдік және қазақстандық селекцияның 23 түрі мен 107 сорты өсіріледі.
"Оның ішінде 20-дан астам гибрид пен көшеттерді біздің бақтың ғылыми қызметкерлері өсірді. Коллекцияда барлығы 2000-нан астам сирень бұтасы бар. Биылғы жылдың көктемінде гүлдеу кезінде біз «Сирингария» бойынша эксклюзивті серуендер өткіздік, онда келушілер бақтағы сиреннің барлық түрімен танысты. Келесі көктемде біз бұл серуендерді қайтадан бастауды жоспарлап отырмыз, себебі, сиреньнің гүлдеуін көргісі келетіндер өте көп", - делінеді хабарламада.
