Үлестік құрылысқа тиесілі 51 нысанның ішінде 15-інің проблемасын шешу қалған
Астана қаласының жаңа әкімі Жеңіс Қасымбек үлескерлермен кездесті, деп хабарлайды ҚазАқпарат.
"Үш көппәтерлі тұрғын үй кешенінің үлескерлерімен кездестім. Олар – "Future home", "Арыстан", "Зере-2" тұрғын үй кешендері. Бұл тұрғын үй кешендері ең күрделі болып саналады. Жалпы алғанда, мұнда жылдар бойы 600-ден астам үлескер отбасы өз кілтін күтіп жүр. Мәселен "Future home" тұрғын үй кешенінің құрылысы 2013 жылы басталған. Нысанның өзі 6 жыл бұрын проблемалы деп танылды. Бұл тұрғын үй кешенінде 200-ге жуық үлескер отбасы бар. Нысанның дайындығы 40%-ды құрайды. Осы орайда екі блокты бұзуға тура келгенін айта кеткен жөн. Себебі құрылыс жұмысын қайта бастау үшін жарамсыз деп танылған болатын", - деп жазды әкім желідегі парақшасында.
Ал "Арыстан" тұрғын үй кешенінде 450-ге жуық үлескер отбасы бар.
"Бұл көппәтерлі тұрғын үй кешені проблемалы құрылыстың ірі нысандарының бірі болып саналады. Оны беру кезінде нысанның тек 20-30%-ы ғана дайын болған еді. Тұрғын үй кешені бірнеше блоктан тұрады, оның бір бөлігі аяқталды – шамамен 270 үлескерге баспана кілті табысталды. Қалған блоктарды да аяқтаймыз. Сол сияқты кездесуде тұрғындар нөсер кәрізін салу, жылы аялдама орнату, қосымша автобус бағытын іске қосу секілді өзге де мәселелерді көтерді. Құрылысы ұзаққа созылған тағы бір нысан – "Зере-2" тұрғын үй кешені 6 жыл бұрын проблемалы деп танылды. Мұнда 230 үлескер отбасы өз пәтерін күтіп жүр. Нысанды беру кезінде тек шұңқыры қазылған күйде ғана болған. Қазіргі уақытта құрылысы қайта жанданды, алайда жұмыс қарқынын арттыру қажет", - деп толықтырда Жеңіс Қасымбек.
Әкім осыған дейін әкімдік қаладағы құрылысы ұзаққа созылған нысандар бойынша үлкен жүйелі жұмыс жүргізгенін. Үлестік құрылысқа тиесілі 51 нысанның ішінде 15-інің проблемасын шешу қалған. Оның 7-еуін биыл аяқтауды жоспарлауда.
"Тағы 8 нысанды (бұл 30-дан астам тұрғын үй кешені) 2023 жылы аяқтауды алдыма міндет етіп қойдым. Біз тұрақты негізде құрылысы ұзаққа созылған нысандардың, аудандардың, елді мекендердің тұрғындарымен кездесіп, жағдайды жіті назарда ұстаймыз. Кездесу барысында айтылған проблемаларды шешу мәселесін қолға алдық", - деді қала басшысы.
