Барлық ақылы тұрақтар коммуналдық меншік болып табылады
Астана қаласы көлік және жол-көлік инфрақұрылымын дамыту басқармасы ақылы тұрақтардың саны 7 мыңнан 10 мыңға дейін көбейтілетінін мәлім етті, деп хабарлайды ҚазАқпарат.
"Мемлекет-жеке меншік әріптестігі шартына сәйкес 10 мың тұрақ орнын іске қосу жоспарлануда. Қазірге дейін 7 мың ақылы тұрақ орындары іске қосылды. Барлық ақылы тұрақтарда "Астана тұрақ кеңістігі" ЖШС паркоматтар мен жол белгілерін орнатты. Барлық ақылы тұрақтар коммуналдық меншік болып табылады", - делінген әкімдіктің ҚазАқпарат сауалына жолдаған жауабында.
Басқарманың дерегі бойынша, бүгінге дейін әлеуметтік нысандар маңында (ауруханалар, емханалар, мектептер, балабақшалар) ақылы тұрақтардың бәрі алынып тасталған. Қазір бұл тұрақтарға көлік қою тегін.
"Елордада қала әкімдігінің тапсырмасы бойынша "Астана тұрақ кеңістігі" ЖШС 55 тұрақтағы 1680 ақылы тұрақ орындарын жойды. Әлеуметтік және басқа да нысандарға жақын орналасқан 55 жер учаскесінен ақылы автотұрақ алынып тасталды. Мәселен, "Сарыарқа" ауданында – 860, "Алматы" ауданында – 325, Байқоңыр ауданында – 107, Есіл ауданында – 388 ақылы тұрақ орындары алынып тасталды. Ақылы тұрақтар алынып тасталған аумақтарда сәйкесінше, көлік тұрағы тегін болады", - делінген ресми мәліметте.
Фото: ТОО "Парковочное пространство Астаны".
