Әділет департаментінде "адалдық алаңы" жобалық кеңсесі ашылған
Атырауда жеке сот орындаушыларына қарызды қайтару туралы 146 мың шағым түскен. Оның ішінде, алимент өндіруге байланысты 8 мың 500 шағым бар, деп хабарлайды ҚазАқпарат тілшісі.
"Өңірлік палатаға жыл басынан бері 146 475 шағым түсті. Оның ішінде, алиментті өндіру үшін 8 мың 500 шағым бар. Барлық шағымның 60 пайызы заңды және жеке тұлғалардың пайдасына ақша қаражатын өндіруге байланысты болып отыр. Осы кезге дейін шағымдардың 45 мыңы аяқталды. Ал, 28 мың 430 құжат ісі аяқталуға жақын. Қалған құжаттар әлі қаралып жатыр", - дейді облыстық жеке сот орындаушылары өңірлік палатасы басшысының орынбасары Гүлдана Қыстаубаева.
Оның айтуынша, арызданушы сот орындаушының жұмысына көңілі толмаған жағдайда облыстық әділет департаментінің немесе өңірлік палатаның көмегіне жүгінуге болады. Сондай-ақ, арызданушы adilet.gov.kz сайтына кіріп, өзінің ЖСН-ін теру арқылы барлық құжатты жүктей алады.
"Жыл басынан бері облыстық әділет департаменті мен өңірлік палата алиментті өндіру бағытында жәрмеңкелер ұйымдастырып, рейдтік шаралар өткізді. Жақында палатаның бастамасымен алиментті қасақана төлемей отырған борышкерлерге қатысты меморандумға мемлекеттік органдар қол қойды. Соның нәтижесінде бір борышкер қылмыстық жауапкершілікке тартылды. Атырауда алимент өндіру бойынша арнайы кеңсе ашылды. Бұл кеңседе төрт сот орындаушысы жұмысқа тартылды", - дейді атқарушылық өндірісті қамтамасыз ету бөлімінің басшысы Зарина Төребаева.
Әділет департаментінде "адалдық алаңы" жобалық кеңсесі ашылған. Онда департамент мамандары күн сайын қабылдау жүргізіп, алиментті өндіруге қатысты кеңес береді.
Еске сала кетелік, бұған дейін Атырауда алғаш рет алимент төлемеген адам қылмыстық жауапқа тартылып, сотталуы мүмкін екенін жазған едік.
Фото: Getty Images / Roman Chekhovskoy.
