"Қолданыстағы субсидиялау жүйесін реформалаудың біраз нұсқасы дайындалған болатын. Жұмыс тобының отырысында бірнеше рет талқыланды. Алайда субсидиялаудың жаңа тетігін енгізуді 2023 жылдың 1 қаңтарына ауыстыруға шешім қабылданды. Бұл әлемдік азық-түлік нарығындағы құбылмалылыққа байланысты және соңғы оқиғалар салдарынан шкі нарықты сақтау мақсатында жасалып отыр", - деді Қарашөкеев үкіметтің бүгінгі отырысында.
Осылайша, биыл қолданыстағы субсидиялау жүйесі сақтала береді. Оған қоса, президент жолдауынан кейін агроөнеркәсіп кешенін субсидиялауға қосымша 92,4 миллиард теңге бөлінеді.
"Ол ақша былтыр жинақталған берешекті өтеуге бағытталады. Сондай-ақ, ауыл шаруашылығы өнімдерін өндіруге пайдаланатын тауарлық және материалдық ресурстардың өсуі салдарын жоюға бағытталады. Жергілікті атқарушы органдар өз кезегінде субсидиялау нормативтерін бекіту жұмыстарын жандандырып, қаражаттың толық игерілуін қамтамасыз етуі керек", - деп атап көрсетті Қарашөкеев.
