Қытайдың маркетплейсі Қазақстан нарығында ойран сала бастады
Аз уақыт бұрын Қазақстанның шағындау нарығының есігін аттап Temu кіріп келген еді. Қытайлық маркетплейс бізге кірді, көрді және осында қаламын деді. Бұл онлайн-алпауытқа сенуге бола ма, одан жергілікті сатушылар мен өндірушілерге келіп-кетер несі бар екенін талдап көрелік.
Temu Қазақстан нарығына қалай келді
Тым батыл баға саясаты. Компания көптеген бәсекелестермен салыстырғанда шынымен де әлдеқайда арзан бағамен тауар ұсынады.
"Temu сатушылардан өз өнімдерін AliExpress-тегі бағадан да төменге сатуды талап етеді. Егер бірнеше сатушы бірдей тауар ұсынса, Temu тек ең төмен бағаны қойған сатушыны таңдайды. Temu-дың минималды сату талаптарына сәйкес келмейтін тауарлар (14 күн ішінде 30 дана және 90 доллар) платформадан алынып тасталады", - деп жазады Wikipedia.
Рас, тауарды өзіндік құнынан екі есе арзанға сата алатын қытайлық алпауытпен бәсекелесу оңай емес. Бұл көлікпен жарысқан жаяу адамның тірлігі сықылды.
Бұған қоса, жергілікті кәсіпкерлер тек баға жағынан ғана емес, маркетингтік стратегия бойынша да бәсекелесуге мәжбүр.
Маркетингтік соғыс. Temu-дің маркетингтік стратегиясы сұмдық. 2023 жылы компания түрлі маркетингтік науқандарға $1,7 млрд жұмсап жіберген, ал 2024 жылы мұндай шығындары кей болжамдар бойынша $3 млрд-қа дейін жетуі мүмкін.
Temu жарнама нарығын толық дерлік жаулап алды. Қытайлық маркетплейс Google мен Meta-ның негізгі клиентіне айналды.
Оның жарнама берудегі белсенділігінің арқасында Google-дегі жарнама құны ондаған пайызға өсті. Google жүйесінің қалай жұмыс істейтіні белгілі – кім көбірек төлейді, соның тауарының жарнамасы алдыңнан бірінші шығады.
Temu-дің Қазақстан нарығына екпінмен енуі онлайн-бизнеспен айналысатын барлық кәсіпкерлерге әсер етуде. Енді олардың іздеу нәтижелерінің алғашқы беттеріне шығуы қиындай түсті, себебі оны қытайлық платформа басып алды.
Жағдай күннен-күнге қиындап барады. Temu сияқты қытайлық маркетплейстер жергілікті бизнесті нарықтан ығыстырып, экономиканың маңызды бөлігін жойып жатыр. Жергілікті кәсіпкерлер табысынан айырылады, себебі олар алып корпорациямен бәсекелесе алмайды.
2023 жылғы деректерге сәйкес, Temu Қазақстандағы сауда көлемін ұлғайтып келеді, өйткені қытайлық тауарларға сұраныс қашан да жоғары. Оның нарықтағы нақты үлесі белгісіз болғанымен, 2023 жылы Қазақстандағы электрондық коммерция 28%-ға өсті, және бұл өсімнен Temu айтарлықтай пайда көріп отыр.
Қорытынды: Temu-дің нарықты жаулауы жергілікті бизнеске қауіпті ма?
Temu-дың тым арзан бағалары мен маркетингтік саясаты отандық өндірушілердің табысын азайтып, олардың банкротқа ұшырау қаупін арттырады.
Нәтижесінде, жергілікті кәсіпорындар жабылып, елдің экономикасы халықаралық алпауыттарға тәуелді бола бастайды.
Қысқасы, түптің түбі қазақстандық бизнес құмға сіңген судай құрдымға кетіп тұрмасын…
Фото: Getty Images.
ТАҚЫРЫПҚА ОЙ ҚОСЫП, ПІКІРІҢІЗБЕН БӨЛІСУ ҮШІН TELEGRAM КАНАЛЫМЫЗ БАР!
