Биыл 902 570 шетелдік елімізден кетті
Қазақстан былтыр 435 408 адамға ұялы байланыс операторына тіркеліп, банк картасы мен шотын ашуға мүмкіндік беретін жеке сәйкестендіру нөмірін берген. Бұл туралы Ішкі істер министрлігі Kazinform агенттігінің сауалына жолдаған жауапта айтылған.
- 2024 жылдың 12 айында елімізге 15 294 699 шетелдік келді. Оның ішінде 5 860 195 Өзбекстан, 3 271 654 Ресей, 962 583 Тәжікстан, 3 335 475 Қырғызстан азаматы кірді, - деп жазылған ресми мәліметте.
Министрлік мәліметінен осы 15 млн шетелдік үшін Қазақстан транзиттік аумақ болғанын көруге болады. Өйткені, ел аумағына бір жылда кірген адамның тек 41 851-і ғана тұрақтап қалған.
- Осы кезеңде 15 252 848 шетелдік шықты. Оның ішінде – 5 820 299 Өзбекстан, 3 301 001 Ресей, 960 926 Тәжікстан, 3 329 523 Қырғызстан азаматы шықты. 2024 жылы елге келген шетелдіктерге 435 408 ЖСН рәсімделді. Жалпы ҚР келген барлық шетел азаматтарының болу мерзімі 30 күн, - делінген жауапта.
Бұл мәліметтен Қазақстан аумағына тек ЖСН рәсімдеу үшін ғана кіретін шетелдіктердің көп болғанын байқауға болады.
Жалпы елімізде Ресей, Қырғызстан, Тәжікстан азаматтары уақытша есепке тұрмай 90 күн бола алады, Өзбекстан азаматтарының болу мерзімі – 30 күн.
ІІМ ақпаратына сүйенсек, 2025 жылдың басынан қаңтар айының аяғына дейін елімізге 925 152 шетелдік келген. Оның ішінде 177 892 Ресей, 367 228 Өзбекстан, 46 037 Тәжікстан, 222 712 Қырғызстан азаматы бар.
- Биыл 902 570 шетелдік елімізден кетті. Оның ішінде 212 795 Ресей, 314 388 Өзбекстан, 45 113 Тәжікстан, 218 565 Қырғызстан азаматы бар. 2025 жылы елімізге келген 27 186 шетелдікке ЖСН рәсімделді, - деп жазады министрлік мамандары.
Фотоколлаж: Azattyq Rýhy.
ТАҚЫРЫПҚА ОЙ ҚОСЫП, ПІКІРІҢІЗБЕН БӨЛІСУ ҮШІН TELEGRAM КАНАЛЫМЫЗ БАР!
