Мессенджерлерде тарап кеткен ол ақпарат – фейк
Батыс Қазақстан облысында "омикрон" штамы анықталғаны туралы ақпарат жалған. Бұл туралы Денсаулық сақтау министрлігінің баспасөз қызметі ҚазАқпарат тілшісіне айтты.
"Мессенджерлерде тарап кеткен ол ақпарат – фейк. Батыс Қазақстан облыстық санитарлық-эпидемиологиялық департаменті басшысының орынбасары Гүлдана Кереева бұл мәліметтің жалғанын екенін, Батыс Қазақстанда бір де бір жағдай тіркелмегенін ресми мәлім етті", - деді баспасөз қызметінің өкілдері.
Ведомство мамандарының айтуынша, аталмыш ақпаратты жариялаған ақпарат құралының басшысы оқырмандардан кешірім сұрап, мәліметті ресурстардан алып тастаған.
Айта кетейік, БҚО санитарлық-эпидемиологиялық бақылау департаменті басшысының орынбасары Гүлдана Кереева өңірлік коммуникациялар қызметінде өткен брифингіде БҚО-да 100-ден астам шетелден келген қазақстандық бақылауға алынғанын ғана айтқан еді. Оның ішінде Мысырдан 69 адам, Ұлыбританиядан 19, Италиядан 13, Германиядан 11 адам келген.
"Облыс аумағында "омикрон" штамы табылған жоқ. Дегенмен COVID-19 эпидемиологиялық қадағалау жүйесінде SARS-COV-2 жаңа нұсқаларын уақтылы анықтаудың маңыздылығын ескере отырып, ковид табылған науқастардың оң нәтиже қорытындылары Нұр-Сұлтан қаласындағы Ұлттық сараптама орталығына жіберілді. Ол сынамалар зерттеліп жатыр", - деген болатын.
