Дәл қазіргі сәтте 22 жастағы отандасымыз әлемдік рейтингте 2 түрлі бағдарлама бойынша тұр
KAZINFORM - Оқ атудан Каирде (Мысыр) өтіп жатқан әлем кубогының кезеңінде 10 метр қашықтықтан пневматикалық тапаншамен ату сайысында Ирина Юнусметова қола жүлдеге ие болды.
ҚР Спорт комитеті мәлім екеткендей, жарыс барысында жерлесіміз 2 дүркін әлем чемпионы Силвиа Штейнер (Аустрия), жастар арасында 4 дүркін әлем чемпионы Ризм Сангван сынды мықты қарсыластардан озып кетті.
Дәл қазіргі сәтте 22 жастағы отандасымыз әлемдік рейтингте 2 түрлі бағдарлама бойынша тұр.
10 метрден тапаншамен ату - 31-орын.
25 метрден тапаншамен ату - 33-орын.
Бұл Ирина үшін әлем кубогындағы алғашқы жүлде емес. Былтыр Индонезия астанасы Джакартада өткен әлем кубогының кезеңінде жерлесіміз 2 мәрте командалық сайыста 3-орын алған еді.
Айта кетейік, Египетте ұйымдастырылып жатқан бәсекеде әлемнің 66 елінен 678 сұрмерген бақ сынауда.
Жарыс 1 ақпанға дейін жалғасады.
Естеріңізге сала кетейік осыған дейін Каирде (Египет) өтіп жатқан әлем кубогының кезеңінде ел намысын кімдер қорғайтынын жазған болатынбыз.
Фото: спорт комитеті.
