Бірақ жазасын өтеу төрт жылға кейінге қалдырылды
Қостанайда тұратын 30 жастағы Михаил ГАЛКИН облыстың ішінде тып-тыныш таксовайттап жүрген.
Тобыл қаласында тұратын 42 жастағы Құндызай КЕНЖЕТАЕВАМЕН өмірінде екінші рет сотта кездесті.
Екеуінің бірінші кездесуі биылғы жылдың басында, 6 ақпанда болған. Таксист Галкин күйеуімен бірге көлігіне мінген Кенжетаеваны Қостанайдан Тобылға апарып тастауы тиіс еді. Масаң күйдегі клиенттер көлікке міне сала қазақша амандасса, Галкин олармен орысша амандасыпты. Соған бола арттағылар аузындағы тістелген алмасын жүргізушінің желкесіне атып ұрған.
Таксист көлікті тоқтатып, клиенттерден түсуін талап етті. Түскеннен кейін бірін бірі жағадан алып, төбелесіп кеткен.
Әйел Галкинге "Ресейіңе қарай қайқай" депті. Дәлелі іске тіркелген бейнежазбада тұр. Ұлтына тиісіп қорлағанын да кездейсоқ куәгерлер естіген екен. Полиция бөлімшесінде жеткізілген соң да Кенжетаева ұлтқа бөлінуін қоймай, "оны емес, мені жақтаңдар" дегендей қылған.
Сот отырысының басында Кенжетаева кінәсін мойындамағанымен, ақыры өз кінәсін толық мойындады. Моральдық және материалдық шығынды өтеп берді.
Сол себепті іс жеңілдетілген тәртіппен қаралды.
Прокурор Кенжетаеваны үш жылға бас бостандығынан айыру жазасын сұрап, ұлтараздықты қоздыру, ұлттық белгісі бойынша адамның ар-намысы мен қадір-қасиетін қорлау ауыр қылмыс деп мәлімдеді.
"Сот үкімімен сотталушы үш жылға бас бостандығынан айырылды. ҚР ҚК-нің 74-бабының 1-бөліміне сәйкес кәмелетке толмаған балаларының болуына байланысты жазасын өтеу төрт жылға кейінге қалдырылды. Үкім заңды күшіне енген жоқ", - деп хабарлады Қостанай облыстық сотының баспасөз қызметі.
Фото: © Ratel.kz / Ярослава Богатырева.
ТАҚЫРЫПҚА ОЙ ҚОСЫП, ПІКІРІҢІЗБЕН БӨЛІСУ ҮШІН TELEGRAM КАНАЛЫМЫЗ БАР!
