Мамандар шегіртке облыстағы Қарқаралы, Шет және Ақтоғай аудандарына тарап жатқанын растады
Қарағанды облысының үш ауданында қара шегіртке қаптады. Зиянкестер жайылым мен шабындықты жайпап, жасыл желекті баудай түсіріп жатыр. Алайда мамандар шегірткені жоюға асықпай отыр. “Алдымен таралу аумағын анықтауымыз керек” деп, жайбарақат жүр, деп хабарлайды КТК телеарнасы.
- Төрт күн бойы осы жерге техникаларын иірді де қойды. Күллі машина, бәленбай техника кіреберіс, Аққайың деген жерде. Енді неге ол жерге иіріп қойдыңыздар десем, “дәріні күттік, мердігер дәрі әкелген жоқ” дейді. Сонда бұл кісілер неменеге келген? Соғысқа оқсыз келген солдат сияқты, - дейді Ақтоғай ауданының тұрғыны Сағдат КҮЗЕМХАНОВ.
Қаптаған зиянкес “Италия шегірткесі” деп аталады. Мамандар әзірге соны анықтапты. Жасыл желекке қырғидай тиген зиянкестер жан-жағын отап бара жатыр, дейді ауыл тұрғындары. Бұлай жалғаса берсе, жайылымсыз қаламыз деп шырылдайды.
Мамандар шегіртке облыстағы Қарқаралы, Шет және Ақтоғай аудандарына тарап жатқанын растады.
Олардың айтуынша, биыл 59 мың гектар жерді улаймыз деген жоспары бар екен. Оған 184 миллион теңге қарастырылыпты. 9 техника, 2 жеңіл ұшақ пен 4 агродрон дайын көрінеді. Бірақ дәрілеу әзірге басталмаған.
“Алдымен шегірткенің таралу аумағын анықтап алуымыз керек”, - деп отыр.
Фото: krymsk-region.ru.
ТАҚЫРЫПҚА ОЙ ҚОСЫП, ПІКІРІҢІЗБЕН БӨЛІСУ ҮШІН TELEGRAM КАНАЛЫМЫЗ БАР!
