Кредит каникулы қашанға дейін созылады дегенге келсек
Сіздің мойыныңызда кредит бар делік. Алайда қазіргі елдегі төтенше жағдайды ескере, банктер несие өтеу мерзімін кейінге шегеріп отыр.
Яғни, 2020 жылдың 16 наурызы мен 15 маусымы аралығында кредиттік каникул бар. Қарыз бойынша төлемдерді кейінге шегеру мүмкіндігі осыған мұқтаж адамдарға берілмек. Олар кімдер? Мәселен, карантиннің енгізілуі себепті жұмысынан айрылғандар, ақы төленбейтін еңбек демалысына шыққандар, жалақысы қысқарғандар немесе тоқтатылғандар және т.б. Қосымша құжаттарсыз бұл шегеру шарасы ресми түрде тіркелген жұмыссыздарға, АӘК алушылар және халықтың әлеуметтік әлжуаз топтарына қатысты қолданылады.
Ал, кәсіпкерлердің несиесі не болмақ? Бұл кредиттік каникул кәсіпкерлерге де қатысты. Мысалы, тауар сатылымы мен көрсетілетін қызмет көлемі азаюы себепті қаржылық жағдайы нашарлаған, тұтынушылар төлемі кешіккен және т.б. себептермен бизнес өкілдері төлемдерін кейінге шегеру мүмкіндігін ала алады.
Мұндай жеңілдікке ие болу үшін азаматтар құжат жинап, банкке баруының қажеті жоқ. Өтінішті онлайн беруге болады.
Ал, халықтың әлеуметтік жағынан осал топтары өтінішсіз-ақ, растайтын құжаттарды ұсынбай, қосымша келісімдерге қол қоймай, негізгі борыш пен пайыз сомасын төлеу уақытын кейінге қалдыра алады.
Және назарға алар дерек: карантин кезінде жұмыс істемейтіндер, ақысыз еңбек демалысында жүргендер, жұмыстан шыққандар, жалақысы, кірісі кеміген азаматтар себептерін көрсетіп, өтініш жазуы тиіс. Бұл екінші деңгейлі банктер, шағын қаржы ұйымдары, ломбардтар мен онлайн-несиелеу компаниялары берген қаражаттарына қатысты. Президенттің тапсырмасынан соң қаржы нарығын және қаржы ұйымдарын реттеу мен дамыту агенттігі осындай ереже бекітті.
Енді әрекет алгоритміне келсек: кредит бойынша төлем мерзімін кейінге қалдыру жөніндегі өтінім банк сайты арқылы қабылданады. Ол сайтта көрсетілген арнайы үлгі бойынша толтырылады. Өтінім беру кезінде клиент әлеуметтік осал топқа жататынын растайтын құжат пен табысынан айрылғаны туралы анықтаманы қоса тіркеуі керек. Өтінім 10 жұмыс күнінде қаралып, нәтиже SMS хабарлама арқылы беріледі немесе банк қызметкері қоңырау шалып айтады. Банкке барудың қажеті жоқ, барлық банктің call-орталығының номерлері бар, бұл аралықта өсімпұл, айыппұл тағайындалмайды. Ескерте кетерлігі, науқан 18 наурызға дейін алынған несиелерге ғана қатысты қолданылады. Сондай-ақ, банк алдында мерзімі өткен берешегі (просрочка) бар клиенттер аталмыш қызметті пайдалана алмайды.
Бүгінде 1,3 млн-нан астам ел тұрғынының және 60-тан астам кәсіп иесінің берешегін өтеу мерзімі кейінге шегерілді делінген Қазақстанның қаржы рыногын реттеу және дамыту агенттігінің мәліметінде. Айта кетерлігі, бұл шара азаматтардың несиелік тарихына еш әсер етпейді.
