Белгілі қазақ ақыны Мұқағали Мақатаевтың 90 жылдығына арналған "Мұқағали" картинасы оның өмірінің соңғы жылдары туралы баяндайды
Қазақстандық "Мұқағали" фильмі Дубайдағы Мeta Film Fest кинофестивалінде бас жүлдеге ие болды, деп хабарлайды ҚазАқпарат тілшісі Ш.Айманов атындағы "Қазақфильм" киностудияның баспасөз қызметіне сілтеме жасап.
Таяу Шығыс, Азия және Африка киноиндустриясын қамтитын Meta Film Fest жаңа халықаралық кинофестиваль 27 қазанда Джумейра Пальмасындағы Nakheel Mall-дағы Vox Cinemas кинотеатрында басталды. Фестивальде 25 елден 70-тен астам фильм көрсетілді.
Байқау бағдарламасына "Мұқағали", "Ұлы дала таңы", "Ақын" және "Конокрады" атты төрт қазақстандық фильм таңдалған болатын.
Белгілі қазақ ақыны Мұқағали Мақатаевтың 90 жылдығына арналған "Мұқағали" картинасы оның өмірінің соңғы жылдары туралы баяндайды. Фильмді ҚР Мәдениет және спорт министрлігінің тапсырысы бойынша Ш.Айманов атындағы "Қазақфильм" киностудиясы түсірді.
"Таспаның сценарийін белгілі қазақстандық жазушы Жүсіпбек Қорғасбек режиссер Болат Қалымбетов пен Ғазиз Насыров бірлесіп жазды. Фильм қазақстандық прокатқа 2021 жылдың 21 қазанында шыққан болатын.
Фильмнің әлемдік премьерасы 25-ші (PÖFF) Таллин кинофестивалі аясында өтті. Онда қазақстандық картина экуменикалық қазылар алқасының жүлдесіне ие болды. Биылғы жылдың наурыз айында өмірбаяндық картина Кераладағы (Үндістан) 26-шы Халықаралық кинофестивальдің "Әлемдік кино" секциясында ұсынылды. Жақында "Мұқағали" фильмі Қазан кинофестивалінде қазылар алқасының арнайы жүлдесіне ие болды. Сондай-ақ, фильм Гатчинадегі (Ресей) "Әдебиет және кино" Халықаралық кинофестивалінде қоюшы-суретші Ермек Өтегеновтың үздік жұмысы үшін қазылар алқасының арнайы дипломына ие болды", - деп хабарлады Ш.Айманов атындағы "Қазақфильм" киностудияның баспасөз қызметі.
