Олар да ұлттық нарығын қытай маркетплейсінен қорғайды
Оңтүстік Корея – әлемдегі ең технологиялық дамыған елдердің бірі және жаһандық электронды сауда нарығындағы маңызды ойыншы. Coupang, Gmarket сияқты жергілікті алпауыттар ел ішінде үстемдік етіп, бәсекеге қабілетті бағалар, тегін жеткізу мен ыңғайлы қызметтер ұсынады. Алайда Қытайдың Temu маркетплейсі Корея нарығына келген соң жергілікті компаниялар жаңа қауіппен бетпе-бет келді. Қытайлық PDD Holdings холдингіне тиесілі Temu агрессивті баға саясаты мен тауарлардың кең ассортиментімен танымал. Дегенмен, Temu Кореяға кіргеннен кейін ел билігі жергілікті бизнесті қорғауға және экономика мен тұтынушыларға тиетін зиянның алдын алуға бағытталған бірқатар қарсы шаралар қабылданды.
Temu Оңтүстік Кореяға қалай келді?
Соңғы жылдары Temu әлемдік нарықта жылдам кеңейіп келеді. АҚШ пен Еуропада айы оңынан туған соң, қытайлық маркетплейс Азия нарығын жаулауға кірісті. Өндіріс пен логистика шығындарын азайту есебінен төмен бағалар ұсынатын Temu корейлік тұтынушылардың назарын бірден аударды. Платформада киімнен бастап электроникаға дейін бәрін табуға болады, әрі бағалары жергілікті бәсекелестерден әлдеқайда төмен.
Алайда танымалдылығына қарамастан, Temu бұл елде үлкен қиындықтарға тап болды. Оңтүстік Корея билігі ішкі нарықты қорғау үшін шаралар қабылдай бастады. Coupang және Gmarket сияқты жергілікті компаниялар ұлттық экономикаға келетін қауіп туралы ескертіп, сондай-ақ Кореяның қауіпсіздік стандарттарына сай келмейтін тауарларды алатын тұтынушылар құқығының бұзылуы мүмкін екенін айтты.
“Балалар курткасында қорғасын жүр”: Temu-дың тауарын тексерсең шошисың
Temu өнімдеріне қатысты үрейді күшейткен маңызды оқиғалардың бірі – Оңтүстік Корея билігі жүргізген тексерулер болды. 2024 жылы елде қытайлық онлайн платформалардан, соның ішінде Temu-дан алынған 144 тауар зерттелді. Нәтижесінде 11 өнім қауіпсіз емес деп танылып, корейлік стандарттарға сәйкес келмейтіні анықталды. Әсіресе балалар киімі мен ойыншықтардан рұқсатты нормадан бірнеше есе асатын улы заттар табылды.
Ең шулы оқиғалардың бірі – балалар курткасынан қауіпті мөлшерде қорғасын мен кадмийдің табылуы. Қорғасын деңгейі белгіленген нормадан 3,6 есе, ал кадмий – 3,4 есе жоғары болған. Бұл тек балалар денсаулығына қауіп төндіріп қана қоймай, халықаралық онлайн платформалар арқылы Қытайдан келетін тауарлардың сапасы мұқият қаралмайтынын көрсетті.
Бұл жағдай қоғамды шошытты. Сарапшылар Temu сияқты қытайлық платформалардағы өнім сапасын бақылауды күшейтіп, тауардың шығу тарихы мен құрамын толық көрсетуді талап етті. Онлайн платформалардағы қауіпсіздік мәселесі Кореяда ең көп талқыланатын тақырыптардың біріне айналды.
Заңдар мен шектеулер
Осынау қатерге жауап ретінде Оңтүстік Корея тұтынушылардың денсаулығын және жергілікті нарықты қорғау мақсатында бірқатар заңнамалық шаралар қабылдады. Солардың бірі – халықаралық онлайн платформалар арқылы келетін тауарларды бақылауды күшейту. Атап айтқанда, Temu мен AliExpress секілді платформалардан келетін өнімдерге міндетті тексерулер енгізілді.
Сонымен қатар, Оңтүстік Корея үкіметі Temu және AliExpress платформаларымен арнайы келісім жасасты. Бұл келісімге сәйкес, осы платформалар арқылы жұмыс істейтін сатушылар тауарлардың ықтимал қауіптері туралы тұтынушыларды хабардар етуге, сондай-ақ ақау немесе сапа стандарттарының бұзылуы анықталған жағдайда қаражатты қайтаруға және өтемақы төлеуге міндетті. Бұл әлемде алғаш қабылданған осындай келісім болды және ол болашақта басқа елдердегі қытайлық онлайн платформаларды реттеуге түрткі болуы мүмкін.
Корея билігі сонымен қатар халықаралық тасымалды бақылауды күшейтті. Елдің кедендік қызметтері Temu арқылы келетін өнімдерге ерекше назар аудара отырып, тексерулерді көбейтті. Бұл шара тұтынушыларды қорғау және сапасыз тауарлардың корей нарығына келуінің алдын алу үшін маңызды деп танылды.
Экономикалық қауіп және жергілікті ритейлерлерді қолдау
Temu-дың танымалдығы артқан сайын, Оңтүстік Корея жергілікті электронды сауда компанияларына айтарлықтай субсидиялар мен жеңілдіктер бере бастады. Бұл ұлттық ритейлерлерге логистика шығындарын азайтуға және бәсекеге қабілетті болуға көмектесуі тиіс. Қазір Coupang сияқты ірі корей онлайн платформаларына салықтық жеңілдіктер мен қызметтерін жаңарту үшін субсидиялар берілуде.
Бұған қоса, Оңтүстік Корея үкіметі жергілікті кәсіпкерлерді жаңа технологияларды қолдануға ынталандыруда. Бұл тұтынушылардың қалауын болжау үшін жасанды интеллект жүйелерін дамыту, сондай-ақ логистика саласында инновациялық шешімдерді енгізу бағыттарын қамтиды.
Әлеуметтік және мәдени аспектілер
Оңтүстік Корея ұлттық брендтерді қолдауға бағытталған патриоттық науқандарды күшейтіп келеді. Қытайлық Temu секілді платформалармен бәсекелестіктің күшеюі жағдайында жергілікті тұтынушылар ұлттық өндірушілерге қолдау көрсетуге көбірек көңіл бөле бастады. “Кореяға дұрысы – корейлік өнім” деген секілді әлеуметтік науқандар қоғамда үлкен қолдау тауып, жергілікті нарыққа оң әсерін тигізуде.
Қорытынды
Оңтүстік Корея өз нарығын қорғау жолында белсенді шаралар қабылдап, тұтынушылардың құқықтары мен жергілікті экономиканың тұрақтылығын қамтамасыз етуге тырысуда. Үкіметтің өнім қауіпсіздігін бақылауды күшейту, салықтық реттеуді күшейту және жергілікті онлайн-ритейлерлерді қолдау секілді әрекеттері ішкі нарықтың тұрақтылығы мен дамуы үшін маңызды қадамдар болды.
Фото: shutterstock.com.
ТАҚЫРЫПҚА ОЙ ҚОСЫП, ПІКІРІҢІЗБЕН БӨЛІСУ ҮШІН TELEGRAM КАНАЛЫМЫЗ БАР!
