Дәрігерлер оның өмірі үшін екі айдан астам уақыт күресті
Петропавлда екі айдан астам уақыт өмір үшін күрескен үш жасар бала қайтыс болды. Бұл туралы Солтүстік Қазақстан облысының денсаулық сақтау басқармасы мәлімдеді, деп хабарлайды Azattyq Rýhy.
Бала 19 желтоқсан күні ауыр жарақатпен көпсалалы облыстық балалар ауруханасына жеткізілген. Дәрігерлер оның өмірін сақтап қалу үшін бар күшін салғанымен, өкінішке қарай, бала есін жимастан қайтыс болды.
Медицина мамандары ашық ми жарақаты, ми шайқалуының ауыр түрі, сол жақ көзіне, маңдай, самай және төбе сүйектеріне зақым келу, ішкі қан кету және травматикалық шок деген диагноздар қойған.
Айта кетсек, полиция аталған оқиғаны тұрмыстық қайғылы жағдай ретінде тіркеген. Алғашқы мәлімет бойынша, бала жарақатты үй жағдайында алған.
24 желтоқсан күні тергеу органдары бұл жағдайды “Ата-ананың бала тәрбиелеу міндетін орындамауы” бабы бойынша тіркеген. Кейінірек істі “абайсызда денсаулыққа ауыр зиян келтіру” бабына ауыстырды. Қазір тергеу жалғасып жатыр.
Фото: © istockphoto.com.
ТАҚЫРЫПҚА ОЙ ҚОСЫП, ПІКІРІҢІЗБЕН БӨЛІСУ ҮШІН TELEGRAM КАНАЛЫМЫЗ БАР!
