Әу баста бетонды төсегенде құрылыс талаптары сақталған жоқ
Бірнеше жыл бұрын күрделі жөндеуден өткен өткелмен жүру қауіпті, дейді жүргізушілер. Өйткені тас жол тесіліп, астынан өтетін теміржол көріне бастаған, деп хабарлайды Информбюро 31.
Көлік иелері көпір бір күні опырылып ортасына түсе ме деп қорқады.
Бұл Петропавлдың орталығы мен жұмысшы кентін жалғайтан жалғыз көпір. Оның қазіргі сиқы адам шошырлық. Асфальті ойылып, астындағы темір арматуралары бетіне шығып жатыр.
Көз алдымызда бұзылып жатқан көпірдің үстімен жүру қауіпті дейді тұрғындар. Көпірдің жолы тесіліп, астынан өтетін теміржол рельстері көрініп тұр.
Ойдым-ойдым жолды жүргізушілер айналып өту үшін қарсы бағытқа шығуға мәжбүр. Соның салдарынан жол апаты да жиі болатынын жасырмайды. Тұрғындар он жыл бұрын бюджеттен жарты миллиард теңге бөлініп, күрделі жөндеу жүргізілген өткелді жауаптылар жыл сайын жамайды. Бірақ одан нәтиже жоқ дейді.
- Меніңше, әу баста бетонды төсегенде құрылыс талаптары сақталған жоқ. Екі бетонның ортасын темірмен жалғап, бекіту керек еді. Енді ол тесіктерді жамай бергеннен пайда жоқ. Ақша далаға кетіп жатыр, - дейді Петропавл қаласының тұрғыны Михаил ДАНИЛОВ.
Әкімдіктегілер шұрық-тесіл жолды жөндейміз деп сендірді. Ал көпірді қайта салу үшін қомақты қаржы керек деп отыр.
- Қаланы абаттандыру аясында ағымдағы жөндеу жұмыстарын жүргіземіз. Ол үшін ақша бөлінбейді. Ал күрделі жөндеу үшін қомақты қаражат керек. Көпірді күрделі жөндеу бір жарым миллиард теңге тұрады, - дейді Петропавл қаласы әкімінің баспасөз хатшысы Әсем АЙТОЛЛА.
Шенеуніктердің өткелді қашан толық қалпына келтіретіні белгісіз. Сондықтан қала халқы қауіпті болса да әзірге ескі көпір арқылы қатынай бермек.
Фото: Информбюро 31.
ТАҚЫРЫПҚА ОЙ ҚОСЫП, ПІКІРІҢІЗБЕН БӨЛІСУ ҮШІН TELEGRAM КАНАЛЫМЫЗ БАР!
