Рейстер бүгін, 13 наурыздан бастап жанданады
Қазақстандық Qazaq Air әуе компаниясы жексенбі, 13 наурыздан бастап Ресейге қайта ұшатынын мәлімдеді.
"Qazaq Air әуе компаниясы Ресейге жоспарланған барлық рейс 2022 жылғы 13 наурыздан бастап жанданатынын және www.flyqazaq.com веб-сайты арқылы билет брондау қолжетімді болатынын хабарлайды. 12 наурыз күні рейстің тоқтатылуымен байланысты уақытша қолайсыздық үшін кешірім сұраймыз", - делінген хабарламада.
Сенбі күні таңертең Qazaq Air әуе компаниясы сақтандыру компаниясынан Ресей аумағында және оның әуе кеңістігінде сақтандыру өтелімі берілмейтіні туралы хабарлама алуына байланысты ресейлік қалаларға ұшуды тоқтататыны хабарланды. Осыған байланысты Нұр-Сұлтан – Новосібір рейсі 12 наурызда ұшпай қалды.
Бұған дейін қазақстандық Air Astana компаниясы Ресейге ұшуды толығымен тоқтатқаны белгілі болды.
Осылайша Қазақстан мен Ресей арасында әуе рейстерін екі қазақстандық компания – Qazaq Air және SCAT, сондай-ақ "Уральские авиалинии" (Ресей) орындайды.
Фото: pixabay.
