Мұқтаж жандарға баспана мен ертеңгі күнге деген үміт сыйлайды
Олар Аяз ата емес. Дәл осындай тақырыппен былтыр Ratel.kz сайтында қызылордалық он жігіт туралы жазғанбыз. Расында, олар Аяз ата не сиқыршы емес, бірақ, тұрмыстың ауыртпалығы батпандай батқан әлжуаз тұрғындарға үміт пен жылу сыйлауда.
Әркімнің босағасын паналаған не қиырдағы лайдан өрген лашықта ілдәлап жүргендердің қаяу көңіліне ертеңнің аяулы сенімін жағып келеді. Бүгінде бес отбасына бес баспана сатып әперді. Одан бөлек, жылына жүздей жанұяға материалдық жәрдем жасайды.
Қайырлы іске ұйытқы болып жүрген Сәбит СҰЛТАН есімді азамат. Сәбиттің шекесі шылқып жүрген жоқ, өзі де бала кезінен жоқшылықтың азабын аз тартпаған.
Бірде мектебіне әлеуеті төмен отбасы балаларына көмек беруге меценат кісі келіпті. Әжептәуір жәрдем берген.
Сол шақта Сәбит "мен де ертең ер жеткенде меценат болам, алушылардан емес, берушілердің санатынан болам" деп армандаған екен. Құр армандамай, құмырсқадай тырбаңдап тірлік етіп өсті, жетілді. Еңбегі берекесін бере бастаған тұста садақа арқылы қайырын еселей түсуді мақсат етті. Өзі сынды қолы ашық, елге болсын деген ниеттегі жігіттердің басын қосып, өзара зекет жәшігін ұйымдастырды.
Ай сайын тапқан табыстарының бір бөлігін салып тұрады. Сосын өзара ақылдасып, шын мұқтаж деген жерлестердің жай-күйін жақсартуға қадам жасайды.
Бүгін міне, бесінші жайлы да жарық пәтер Гүлжазира МАХАНОВА есімді келіншекке бұйырды. Гүлжазира көпбалалы ана, қаланың сыртындағы Сабалақ шағын ауданындағы отын-суы жоқ мына лашықта өмір сүріп келді.
Өмір сүріп дегеннен гөрі өлместің күйін кешіп келді деген дұрысырақ шығар. Төрт баласын әкесіз асырауда. Жуырда ойламаған жерден жиенді (немерелі) болды. Тағдыр шығар. Олар да Гүлжазираны паналап отыр. Балаларға Сабалақтан салпылдап қаладағы мектепке қатынау, одан қалды суы, газы жоқ үйде тұру оңай болмады. Суды каналдан тасып ішкен. Қызылордада канал тұрмақ, дария тартылып жатқанда, ондағы ылғалдың сапасын айтудың өзі артық.
"Сүзіп іштік, амал нешік, басқа түссе, бәріне көндігесің. Қыста балаларым су алам деп, каналға құлап, жүрегім жарылып кете жаздаған. Сол кезде бізге де бір жақсылық бұйырар, жыртық үйдің құдайы бар демеуші ме еді халық деп отбасымды жұбатқам, шүкір, бүгін қолымыз мынадай жаңа әрі жарық баспанаға жетті, тіпті сене алар емеспін, еріксіз жылай берем", - дейді келіншек толғанысын жасырмай.
Пәтер жаңа үйде, 2-қабатта орналасқан, жарық әрі жылы.
Сәбит достарымен бірге жөндеу жұмысын жасап, қажетті жиһаз, көрпе-төсек, ыдыс-аяқ, азық-түлік сынды керек-жарақтың бәрін реттеп жатыр.
Бұл қайырымды жігіттер тек баспана берумен шектелмей, оның жөндеу жұмысын, керек дүниесін, ас-суын қамдап жүретін әдеті бар. Өйткені онсыз да ілдәлап жүргендер бұл тірлікті түгендей алмасын түсінеді, сондықтан "қайыр қылсаң – бүтін қыл" тәмсілін ұстанады. Гүлжазираның балалары дән риза. Әр бөлменің терезесінен сыртқа қарап, сүйсінуде. Олармен сөйлескенімізде бірі хирург, енді бірі тіс дәрігері болуды армандайды екен. Бекер емес, анасының жағдайын түзегісі келген ниеттен туған мақсат екені түсінікті. Жеткіншектердің жоспары орындалсын деп тіледік.
Сәбит және оның командасы алдағы уақытта да қайырымдылық істерін жалғастырмақ. Бұл жігіттер тек баспана әперумен ғана емес, заттай, азық-түліктей жәрдем жасауды ғұрыптап келеді. Пандемия кезінде емдеу орындарын оттегі баллондарымен, басқа да медициналық құрал-жабдықтармен қамтамасыз етті.
"Садақа бергеннен, кісіге көмектескеннен кеміп қалмайсың. Жаратушы ие оның орнын еселеп толтырады, жүрегіміз жылы, қолымыз ашық, пейіліміз кең болса, еліміздің ахуалы жақсара түседі. Жарыссақ гаджет не шет елдік көліктің қымбаттығымен, үйдің зәулімдігімен емес, бір-бірімізге деген адами қасиеттің артықтығымен жарысайық", - дейді Сәбит пен оның командасы.
Айтпақшы, Сәбиттің де, оның қолы ашық достарының да коттеджі, қымбат көлігі жоқ, қарапайым көп қабатты үйдің пәтерінде тұрады, ортаңқол көлік мінеді.
Фото: Ⓒ Ratel.kz / Айнур Тунгышбаева.
