Облыс әкімдігінің мәліметіне сүйенсек, Өскеменде көпқабатты үйлер құрылысы қарқынды жүріп жатыр
ШҚО әкімдігінде өткен жиналыс барысында Өскемен қаласында құрылыс қарқыны артқандықтан жылу энергиясы тапшылығы туындау мүмкіндігі талқыға салынды, деп хабарлайды ҚазАқпарат тілшісі.
Облыс әкімдігінің мәліметіне сүйенсек, Өскеменде көпқабатты үйлер құрылысы қарқынды жүріп жатыр. Соған байланысты алдағы жылдары жылу энергиясының тапшылығы туындамас үшін бірқатар шара қолға алынуы тиіс.
"Қазірдің өзінде жылу орталығындағы №2 қазандықты кеңейтуге арналған жобалық-сметалық құжаттама бар. №16 қазандық агрегаты бойынша да ауқымды жоба дайындалуда. Меншік иесі оны іске асыру мерзімдерін анықтап, құжаттарды ретке келтіруде. Осы жобаларды жүзеге асыру қосымша 240 гигакалория береді. Бұл алдағы бес жылдағы жылу тапшылығын жояды", - деді облыс әкімі Даниал АХМЕТОВ.
Өз сөзінде ол қала әкіміне талдау жүргізу және қуаттылықты арттыру үшін не істеу керектігін саралауды, жаңа ЖЭО салу немесе қолда бар жылу көздерін жаңғырту үшін жобалаушы мамандарды шақыруды тапсырғанын жеткізді.
"Өскеменде құрылыс қарқыны төмендетпейтіндіктен, жылу тапшылығы туындамас үшін барлық тиісті жұмыс атқарылатын болады. Жағдай тұрақты бақылауда", - деді аймақ басшысы.
Фото: beton-area.com.
