Өзекті мәселе енді қайтіп шешімін таппақ?
Жамбыл облысында шаруалар судан тарығып отыр, деп хабарлайды 24KZ. Әсіресе бір ай бұрын дән сепкен Байзақтық диқандарға қажетті су әлі жеткен жоқ. Бұған жауапты Қазсушар мамандары: “Талас тартылып барады”, - дейді.
Егістік алқаптарына су жетпей қалған 30-ға жуық шаруа Қазсушар мекемесіне барды. Солардың арасында Бақытжан ЖИДЕБАЕВ. Биыл диқан 40 гектарының жартысына арпа мен бидай еккен. Қалған алқапта дала жұмыстарын дайындап қойғанымен, дақыл себу науқанына кірісе алмай отыр. Себебі еккен егісінің өзін суара алмаған.
- Жоңышқаға 1 млн 600 мыңдай ақша кетті. Оның бәрі күйіп кетейін деп жатыр. Не шөп жоқ. Малға беретін шөп таппай отырмыз. Былай шығып көрсеңіздер, күйіп кеткен жердің бәрі. Сол жоңыршқадан бір нәрсе алып, малға берейін деп отыр едік, оны да құртайын деп отыр ғой. Арпаға 800 мыңдай кетті. Ол да жоқ болып тұр. Мынандай бір қарыс болып тұр бойлары, - дейді шаруа Бақытжан Жидебаев.
Шағымын айта келген шаруалар: “Бір апта ішінде су алмасақ, егісіміз түгел күйіп кеткелі тұр”, - деп күйінеді. Сондықтан осы іске жауаптылардан келісімшарқа сай суды жеткізуді талап етіп отыр.
- Бәрінің жоңыршқасы қурап жатыр. Бәрінің малы бар, бәрі сонымен күн көріп отырған адамдар. Ал қазір туралап келгенде Қазводхоздың кінәсінан, неге олар қырғыздармен келісімшартқа отырмады? Соның бәрін неге ерте шешпеді? Соның бәрін шешіп ерте шешкен кезде тура осыған келмейтін едік қой біз. Қаншама елді шырылдатып отыр қазір, құрғап кеткен “полялары”, - дейді шаруа қожалығының басшысы Нұркен НҰРДӘУЛЕТ.
Қазсушар мекемесінің мамандары биыл жауын-шашын аз түскенін және таудағы мұздықтардың аз болғанын алға тартады. Су қоймаларының толық толмау себебі де сонымен байланысты екен. Ал Қызрғызстандағы Киров су қоймасынан 18 текше метр су сұратқанымен, келіп жатқаны 10 текше метр ғана. “Ал бұл үш ауданның шаруалары үшін жеткіліксіз көлем”, - дейді салаға жауаптылар.
- Бірінші суарым бәрі дақылдарын шығарғысы келеді. Бөліп кезекпен алуға келіспей отыр. Бәріне бір мезетте су керек болып тұр. Бірақ сонда да осы жағдайдан шығу үшін біз Терісащыбұлақ су қоймасын ашып, қазір қосымша 5 куб Аса-Талас деген каналымыз бар, өзенаралық сол канал арқылы тастап жатымыз. Бір 3-4 күнде келіп қалу керек ол су осы жерге, - дейді “Қазсушар” РМК Жамбыл филиалы директорының орынбасары Бағдат БЕЙСЕНҚҰЛОВ.
Сумен қамту ісіне жауаптылар “диқандарды сусыз қалдырмаймыз”, - деп уәде берді. Тек биыл тіршілік нәрін үнемдеп қолдануға тура келмек. Сол себепті шаруа қожалықтарына суды аз тұтынатын дақылдарды егуді ұсынып отыр.
Фото: 24kz телеарнасы.
ТАҚЫРЫПҚА ОЙ ҚОСЫП, ПІКІРІҢІЗБЕН БӨЛІСУ ҮШІН TELEGRAM КАНАЛЫМЫЗ БАР!
