Қытай маркетплейсіндегі тауарлар туралы
Temu – өте төмен бағаға неше түрлі тауар табылатын платформа, көрген адамның көкейін теспей қоймайды. Алайда, одан зат сатып алмас бұрын, өнімдердің қауіпсіздігі мен сапасына байланысты қауіптерді мұқият бағалау қажет.
Temu-дағы тауарлар туралы фактілер
1. 2024 жылдың мамырында Ұлыбританияда деректі фильм шыққан. Онда осы платформа арқылы сатылатын тауарлардың улылығы мәселесі көтерілді. Мысалы, бағасы бар-жоғы £2,17 болатын күміс алқаның құрамында Ұлыбритания заңнамасында рұқсат етілген мөлшерден он есе көп қорғасын болған. Бұл металл ұзақ уақыт бойы әсер еткен жағдайда бүйрекке зақым келтіруі, түсік тастауға және сперматозоидтардың азаюына әкелуі мүмкін.
Тағы бір мысал – £2,97 тұратын алтын баудың құрамында да ауыр металдардың мөлшері шамадан тыс жоғары болған.
Тағы бір алаңдататын жағдай – Temu-да сатылған тырнақ желіміне байланысты оқиға. Ол өнімді қолданған 11 жастағы қыз үшінші дәрежелі күйік алған, бұл жағдай платформада сатылатын өнімдердің қауіпсіздігін бақылау мәселесін тағы көтерді.
Рединг университетінің профессоры Лоуренс ХАРВУД салақ сертификатталған немесе Еуропа мен АҚШ нарықтары үшін мүлдем сертификатталмаған тауарларды пайдаланудың қауіпі жоғары екенін атап өтті. Платформа әлі күнге дейін тауар жеткізушілердің өндірістік процестерін мұқият тексермей келеді.
Бірақ Temu барлық өнімдері TÜV SÜD және SGS сияқты халықаралық ұйымдар тарапынан сертификатталатынын мәлімдейді.
2. 2024 жылдың жазында Оңтүстік Корея Temu және басқа да қытайлық онлайн платформалар арқылы сатылатын тауарларды тексерген.
12 шілде мен 9 тамыз аралығында қытайлық үш сауда платформасында сатылатын 144 тауардың қауіпсіздігі тексеріліп, олардың 11-інде қауіпсіздік жағынан мәселелер бар екені анықталды.
Тексерілген өнімдердің ішінде:
- 94 ас үй бұйымы,
- 13 косметикалық өнім,
- 28 сандали мен бас киім,
- 9 гигиеналық тауарлар болды.
Зерттеу нәтижелері:
- Екі сандалиде фталат пластификаторларының мөлшері рұқсат етілген деңгейден 167,5 және 229,2 есе жоғары болды. Фталаттар канцерогендік заттар санатына жатады және бедеулікке әкелуі мүмкін.
- Екі сандалиде никель мөлшері қалыпты деңгейден 2-9 есе көп болып шықты. Никель терінің аллергиялық реакциясын тудыра алады.
- Үш бас киімде формальдегид мөлшері рұқсат етілген деңгейден екі есе жоғары болған, ал pH деңгейі 9,3-ті құрады, бұл қалыпты 4-9 стандартынан асып түседі.
- Екі алюминий ыдыста никель мөлшері нормадан екі есе көп болды.
- Екі тырнақ лагының құрамында диоксан деңгейі нормадан 3,6 есе, ал метанол мөлшері 1,4 есе жоғары екені анықталды.
- Temu-дан сатып алынған балалар күртесінде рұқсат етілген нормадан 622 есе артық зиянды заттар табылды. Оның ішінде қорғасын 3,6 есе, кадмий 3,4 есе жоғары болды.
- Temu-дан алынған комбинезонда фталат мөлшері рұқсат етілген нормадан 294 есеге асып кеткен.
- Temu-дағы сандали табанында қорғасын мөлшері нормадан 11 есе көп болды.
Осы тексерулерден кейін Сеул билігі бақылауды қатаңдатып, тауарларды апта сайын тексере бастады.
“Сеул үкіметінен ескерту алғаннан кейін, біз дереу ішкі тергеуді бастадық. Біз бұл өнімдерді платформадан жедел алып тастадық және сатушылардың қауіпсіздік стандарттарына сәйкестігін қамтамасыз ету үшін жүйемізді жетілдірудеміз”, - деп мәлімдеген Temu өкілі AFP агенттігіне.
3. 2024 жылдың қыркүйегінде АҚШ-та Temu және Shein тексеріле бастады.
АҚШ үкіметі бұл екі қытайлық маркетплейсті “нәрестелер мен жас балаларға арналған қауіпті тауарлар сатады” деген айыппен тергеуді ұсынды.
АҚШ Тұтынушылар қауіпсіздігі комиссиясының (CPSC) екі мүшесі ашық хатта осы компаниялардың Американың қауіпсіздік стандарттарына қаншалықты сәйкес келетінін тексеруді талап етті.
CPSC комиссарлары Питер ФЕЛЬДМАН мен Дуглас ДЗИЯК БАҚ-тағы “бұл сайттарда балаларға қауіпті тауарлар оңай табылады” деген хабарларға сүйеніп, “бұл платформалардың қалайша төмен бағамен тұтынушыға тікелей тауар жеткізетінін түсінгіміз келеді” деп мәлімдеген.
4. 2024 жылдың қазан айында Еурокомиссия Temu-ға қатысты тергеу бастады.
Еуроодақтың тұтынушылар құқығын қорғау органдары қытай маркетплейстері, соның ішінде Temu, цифрлық қызметтер туралы заңды бұзады және контрафакт өнімдер сатады деп күдіктенген.
Еурокомиссия мәліметінше, қытайлық сатушыларға қатысты шағымдардың 75%-ы осы платформаларға тиесілі.
Еуропалық тұтынушылар ұйымының (BEUC) өкілі Сильвия МАУРЕРДІҢ сөзінше, ең үлкен қауіптер:
- Балалар ойыншықтары мен косметикадағы қауіпті химиялық заттар;
- Өрт немесе тоқ соғу қаупі бар электр құрылғылары;
- Істемей қалатын түтін детекторлары;
- Қорғау функциясын атқармайтын мотоцикл шлемдері.
Еуроодақ елдеріне жыл сайын €4,6 миллиардқа жуық тауар импортталады, олардың басым көпшілігі Қытайдан келеді.
Еуропа бұл жағдай тұтынушылардың денсаулығы мен қауіпсіздігіне қауіп төндіріп, қоршаған ортаға зиян келтіретінін, сондай-ақ заңды бизнеске зиян тигізетін әділетсіз бәсекелестікке әкелетінін айтып, алаңдаушылық білдіруде.
Германия, Дания және Ирландия сияқты елдерде билік Temu-ға қатысты қатаң шаралар қабылдауды талап етуде.
Фото: Aloysius Wong/CBC.
ТАҚЫРЫПҚА ОЙ ҚОСЫП, ПІКІРІҢІЗБЕН БӨЛІСУ ҮШІН TELEGRAM КАНАЛЫМЫЗ БАР!
