Еуропалықтар туризмнен шаршады
Испания мен Италияның бірнеше қалаларында шамадан тыс көп туристерге қарсы наразылық шаралары өтті. Митингке шыққандар саяхатшылардың санын азайтуды талап етіп отыр, деп хабарлайды ҚазАқпарат DW-ге сілтеме жасап.
15 маусым күні, саяхатшылар арасында танымал Испания мен Италия қалаларында бақылаусыз туризмге қарсы демонстрациялар ұйымдастырылды.
Reuters агенттігінің мәліметінше, Барселонада шамамен 600 адам қатысқан митинг кезінде халық: “Сенің демалысың – менің қайғым” деп ұрандап, “Жаппай туризм қаланы жояды” және “Олардың ашкөздігі бізді құртады” деген жазуы бар плакаттар ұстап шықты.
Кейбір белсенділер су тапаншасымен атып, дүкендер мен қонақ үйлердің терезелеріне “Туристер, үйлеріңе қайтыңдар!” деген жазуы бар жапсырмалар жапсырған.
Reuters-тің дерегінше, халқы 1,6 миллион адамды құрайтын Барселона өткен жылы 26 миллион турист қабылдаған.
Венеция тұрғындары жаңа қонақ үйлерге қарсы
Туристік ағынды шектеуді талап еткен наразылықтар Оңтүстік Еуропаның басқа да қалаларында өтті. Испанияда – Малага, Пальма-де-Майорка, Сан-Себастьян, Гранада және Ибица аралында; Италияда – Генуя, Палермо, Неаполь, Милан және Венеция қалаларында. Венецияда наразылық білдірушілер 1500 туристі қабылдай алатын екі жаңа қонақ үйдің салынуына қарсы шықты.
Reuters агенттігі 2025 жылы Еуропада халықаралық сапарларға жұмсалатын шығындар 11%-ға өсіп, 838 миллиард АҚШ долларына (727 миллиард еуро) жетуі мүмкін деп болжайды.
Франция мен Испанияда турист қабылдау рекордтық көрсеткішке жетуі мүмкін деген болжам бар.
Фото: Pau Venteo/AP Photo/picture alliance.
ТАҚЫРЫПҚА ОЙ ҚОСЫП, ПІКІРІҢІЗБЕН БӨЛІСУ ҮШІН TELEGRAM КАНАЛЫМЫЗ БАР!
