Түйені жел шайқаса, ешкіні аспаннан ізде деген осы болар
Қызылорданың желі бүгін ерекше күшіне мінді. Синоптиктер секундына 30 метр жылдамдықпен соғып тұр деп мәлімет таратуда. Ұйытқыған жел Сыр елінің біраз әлеуметтік нысандарының шатырын аспанға алып ұшып, кейбір аумақты жарықсыз қалдырды.
Қала орталығындағы "Болашақ "университетінің шатыры жабынымен қоса құлады. Абырой болғанда, адам аман. Блогерлер Қызылорданың "Болашағы" жоқ" деп әзіл аралас пікірін жарыса жариялап жатыр.
Бейнеде: Қызылордадағы дауыл.
Сондай-ақ, Жалағаш ауданы орталығындағы мәдениет үйі де шатырсыз қалды.
Жаңақорған ауданындағы Шалқия кентінің номері 86-шы орта мектебінің шатыры ұшып, осы кенттің 2 электр бағанасы құлады. Соның салдарынан 6 елді мекен жарықсыз отыр.
Әлеуметтік желі қолданушылары бәріне кінәлі 22 наурыз күні Байқоңырдан ұшырылған зымыран деп пікір қалдыруда.
Еске сала кетейік, осыдан 2 күн бұрын 34 британдық жер серігі бар зымыранның көкке көтерілгені туралы ресейлік ақпарат құралдары қуана хабар таратқан болатын.
"Коронавирусқа байланысты үйде отырғанымыз да дұрыс болды, әйтпесе әлгі шатырлар басымызға түсіп, жарақат алар ма едік, кім білсін, әр істің бір хайыры бар деген осы" деп қызылордалықтар өздерін жұбатып отыр.
Бейнеде: Оңтүстік Қазақстандағы дауыл.
